Kalaallit Airports: Kinamiut amerikamiullu timmisartui nunatsinnut mittassasut
Kalaallit Airports nunat tamalaallu akornanni kattuffik Nuummi Ilulissanilu mittarfissat nunat tamalaat akornanni timmisartuussinikkut attaveqatiinnermi ineriartortinneqarnissaat pillugu ukiuni pingasuni suleqatigiinnissamik isumaqatigiissuteqarput.
Nunat tamalaat akornanni kattuffik Airport Strategy & Marketingimik ateqartoq soorlu Europami, Amerika avannarlermi Asiamilu timmisartuutileqatigiiffiit nunatsinnut aqqutiliornissamut neqerooruteqarnissaannut periarfissamik sulissuteqassaaq.
Kalaallit Airports tusagassiuutinut nalunaarummi taama allappoq.
AAMMA ATUARUK Kalaallit Airports pisortartaartoq
Airport Strategy & Marketingip pisortaata, David Stroudip suleqatigiinnissamut periarfissatsialaat takusinnaalugit oqaatigaa.
- Kalaallit Nunaat asseqanngitsumik niuernikkut periarfissaqarpoq aamma mittarfinnik ataqatigiimmik aaqqissuussinerit nutaat takornariat amerlassusaannik taamaallaat qaffaassanngillat. Qularinngilarput, Kalaallit Nunaanni mittarfinnut nutaanut aqqutinik ineriartortitsineq aningaasarsiornermik ineriartortitsissasoq, nunallu ilaanut tamanut periarfissanik nutaarluinnarnik pilersitsissasoq, pisortaq tusagassiuutinut nalunaarummi oqarpoq.
Takoriaqaqqilissasoq
Kalaallit Airportsip pisortaanertaavata, Jens Lauridsenip coronap ilungersunartorsiortitsinera qaangiuteriarpat nunatsinnut takornariarusuttoqaqqilissasoq naatsorsuutigaa.
- Neriulluartorujussuuvugut. covid-19 sioqqullugu, takornariat aamma nunanit assigiinngitsunit Kalaallit Nunaannut timmisartut angallannerat aalajaatsumik qaffakkiartornerat takusimavarput. Kalaallit Nunaanni asseqanngitsumik takornariaqarnermut periarfissanik, mittarfinnillu nutaanik – nunani assigiinngitsuni timmisartortitseqatigiinnik isumaqatigiissusiornissamut aallaaveqarpugut pitsaasunik
- Taamaattoq aqqutinik ineriartortitsineq sivisusarpoq, timmisartullu nammineerlutik takkunneq ajorput. Ilutigalugu timmisartortitsineq tamakkerluni maannakkut ajornartorsiorpoq. Taamaammat Airport Strategy & Marketingimik, niuerfimmik tassanilu peqataasunik tamanik ilisimasalimmik peqateqarnissaq pingaaruteqarluinnarpoq, pisortaaneq oqarpoq.
