Samuelsenip Issittoq pillugu oqaaseqarnera Espersenip Lidegaardillu isorigaat

Taama iliorput Samuelsen KNR-mit apersorneqartilluni sapaatip akunnerata siuliani oqarmat Issittumi Siunnersuisoqatigiinni suliani pingaarutilinni tulleriiaarisimanani.

- Isumaqarpunga nunanut allanut tunngasunut ministerip nalunaarutaa ilatsiinnarpallaartoq.

Dansk Folkepartiimi siulittaasup tullia, Folketingimi nunanut allanut tunngasunik ataatsimiittartuini aamma siulittaasuusoq Søren Espersen taama oqarpoq.

Isornartorsiuinera pivoq Anders Samuelsen sapaatip akunnerata siuliani ima aperineqarluni akimmat:

- Issittumi siunnersuisoqatigiinni siullertut suut suliassaasoraagit?

- Suliassani pingaarnersiuinikuunngilanga. Issittumut tunngasut tamarmik oqallisissaqqipput, Anders Samuelsen taaa oqarpoq.

Naalagaaffeqatigiit Issittumi sunniutigisinnaasaat eqqarsaatigalugit naalakkersuisut suniarnerlutik erseqqissumik ilisimasariaqaraat, Søren Espersen isumaqarpoq.

- Issittumi pissanganartunik periarfissarpassuaqarpoq. Tassaappullu tamakku isiginiagassat - sunik pilersitsisoqarsinnaanersoq.

Namminerlu imaani isumannaatsuunissaq eqqaavaa, avatangiisini ajunaarnersuit, aammalu inuussutissarsiutinik ineriartortitsineq ingammik takornariaqarnikkut. Tassaapput pingaarnertut eqqartorneqarsinnaasut pingasut, Issittumi siunnersuisoqatigiit politikkikkut pingaartitarisariaqangaat.

Aammattaaq nunanut allanut tunngasunut ministeriusimasup Martin Lidegaardip Samuelsenip nalunaarutaa pikkunaannerarpaa.

Lidegaard isumaqarpoq silap pissusaa pillugu isumaqatigiissutit inuussutissarsiornikkullu siuarsaanerit pingaarnerpaanut ilaasut Danmarkillu Issittumi siunnersuisoqatigiinni siuttuuffigisariaqagai.