Sakkuaakkunnaarnermi isumaqatigiissut naapertorlugu inuit arfinillit iperagaasut
Hamasikkut tigusartik arfernat maanna Israelimiunut tunniussimaleraat Israelimiut sakkutuuisa nalunaarutigaat. Taama nutaarsiassaqartitsivik Reuters allappoq.
Taamaasilluni iperarneqartussatut naatsorsuutigineqartut arfinilissaat ullumi tunniunneqarpoq.
Israelimiut nutaarsiassaqartitsiviisa Røde Korsinut tunniunneqartoq Hisham Al-Sayediunerarpaat.
Kina iperagaatinneqartoq Israelimiut sakkutuuinit taaneqanngilaq.
36-nik ukiulik Hisham Al-Sayed Gazap killeqarfiani ukiuni qulingajanni parnaarussaareersoq Israelimiut oqartut, nutaarsiassaqartitsivik AFP allappoq.
Taama nalunaartoqareersoq Israelimiut sakkutuuisa, ilumut tigusani arfinilissaat maanna nunaminniilersoq nalunaarutigaat.
Israelimiut Hamassikkullu sakkuaakkunnaarnermik isumaqatigiissutaanni ilaatigut taama tigusarisimasaminnik paarlaaqatigiinnissaq isumaqatigiissutaavoq.
Arfininngormat siuliani parnaarussat nunaminnut utertinneqartut tassaapput 40-nik ukiulik Tal Shoham, 39-nik ukiulikAvera Mengistu, 27-inik ukiulik Eliya Cohen, 22-nik ukiulik Omer Shem Tov kiisalu 23-nik ukiulik Omer Wenkert.
Illuatungaani palæstinemiut katillugit 445-it sorsuunnermi aamma ukiopassuarni pineqaatissinneqaraluartut Israelikkormiunit tunniunneqassapput.
Hamassikkunnit iperagaasussat katillugit 33-iupput, taakkunannga suli uumasut arfinillit kingulliit tunniunneqarput. Tamanna sakkuaakkunnaarnissamik isumaqatigiissummi januaarip 19.-anni atuutilersumi isumaqatigiissutaavoq.
Maanna Gazami tigusarineqarsimasut 60-it sinnerutissangatinneqarput, taakkunannga affai suli uumasut ilimagineqarpoq.
Oktoberip arfineq-aappaani 2023-mi Hamasikkut saassussinerminni ilanngullugit inuit 251-it tigusarineqarput.
Taama pisoqariitsiartoq Israelimiut Gazap killeqarfiani akiniaapput.
Katillugit inuit 48.319 akersuuttoqarnerani toqutaapput, taakkunannga amerlanersai sakkutuujunngillat. Kisitsisit Hamassikkut peqqinnissaqarfiata ministereqarfianit paasissutissiissutigineqartut FN-imit tutsuiginartutut nalilerneqartut nutaarsiassaqartitsivik AFP allappoq.
