Sakialluuteqarnerup ammasumik oqaluuserineqarnissaa suli paqugimineqartoq
Nunatsinnilu sakialluuteqarnerup ammasumik oqaluuserineqarnissaa suli tunuarsimaarfigineqartarpoq. Tamannalu peqqissaasup inuillu naapitatta ilisarineqarsinnaavaat:
Aqqusinermi naapitatta sakialluttarnerup suli ammasumik oqaluuserineqartannginnera ilisarisinnaavaat.
- Nammineq tuberkuloserunik allanut oqaluttuarinissaa paqumigisinnaavaa immaqa inuit oqalupallattarnermik, Sikkerninnguaq Tobiassen taama oqarpoq.
Tamannalu ammasumik oqaluuserineqartannginnera peqqissaasup sulinermini aamma nalaattuartarsimavaa.
- Aappi misigisarparput tamanna, Dronning Ingridip Peqqissaavissuani nuna tamakkerlugu sakialluut pillugu peqqissaasoq, Anna Kiørboe Neve oqarpoq.
Sakialluutillit nuna tamakkerlugu siorna 61-iupput, taamatullu nalaataqarneq inuttut imaannaanngitsuusartoq naapitatta ilaata oqaluttuaraa:
- Quersukujunneq , unnuakkut kiaguttarneq, qasuneq pisulaarlunilu qasuneq nuanniittorujussuuvoq taamatut nappaateqarluni, John Egede taama oqarpoq.
Inuit sakialluuteqarlutik paasigaangamikku annilaangalersinnaasartut, peqqissaasoq oqarpoq.
- Sakialluuteqartut qanigisaminnut tunillaassuisoorsimagaangamik kanngusuutigisinnaasarpaat, sakialluutip toqqutigineqarsinnaannera aamma annilaangatigisarpaat. Uagullu tamanna paasititsiniutigissallugu suliassaraarput.
Sakialluutimmi inuit immikkoortinneq ajorpai inuit kikkunnulluunniit tunillatsissinnaapput napparsimalersinnaallutillu, peqqissaasoq taama oqarpoq.
Sakiaalluutillit nungutivinneqarnissaat suli ungasikkaluartoq katsorsaasuartoqartariaqartoq peqqissaasoq oqarpoq.
- Sakialluuteqartut sapinngisamik sioqqutsisumik katsorsarneqarsinnaanissaat pingaaruteqarpoq, aamma katsorsaasuartoqartariaqarpoq, peqqissaasoq Anna Kiørboe Neve oqarpoq.
Susassareqatigiinnissarlu naapitatta ilaata siunnersuutigaa
- Pasitsaassaqaraanni ingerlaannaq nakorsiarnissaq misissortipallannissaq nammineq tuberkulosernerluni imaluunniit nalunngisaq tuberklosersorigaanni kajumissaarlugu nakorsiarnissaanut.
