Saattuartassat Naalakkersuisunit ilaneqanerat GA-p qisuariaateqarfigaa
- Naalakkersuisuugallartut aqutsiveqarfimmi Nuummit Paamiunut saattuartassat 1200 tonsinut qaffappaat. Tamanna pivoq, ukiumut pisassiissutaasut 950 tonsit septembarimi ilaneqarnerisa kingorna. Kisianni aalajangerneq taamatut qaffaanissamik malitassat avaqqullugit pivoq, tassalu Aalisarnermi Siunnersuisoqatigiit tusarniaqqaarnagit, Sulisitsisut Peqatigiiffiat GA, tusagassiuutinut nalunaarummi ilaatigut allappoq.
Aqutsiveqarfimmi pineqartumi ukiumut saattuartassiissutit 950 tonsiugaluarput, saattuartassiissutigineqartullu septembarimi nungunneqarlutik. Aalisartut ukiup sinneranut aalisarsinnaanissaat ilaatigut qulakkeerniarneqarpoq, Nuummimi saarullinniarneq qaangiutilermat.
AAMMA ATUARUK Nuummit Paamiunut saattuartassat ilaneqartut
Saattuartassanik amerliliinermi pisassiissutitut inassutigineqartut qaangerneqannginnerat Naalakkersuisuugallartut tusagassiuutinut nalunaarumminni erseqqissaatigaat.
Sulisitsulli Peqatigiiffiata tungaannit tamanna eqqarsarnartoqartinneqarpoq, saattuartassanik pisassiineq Aalisarnermut Siunnersuisoqatigiit avaqqullugit pisassiisoqarnera apeqquserlugu.
- Suliarlu Aalisarnermi Siunnersuisoqatigiit eqqartorsimanngimmassuk apeqquserusunnarpoq taamatut avataani sinerissallu qanittuani pisassat ataatsimuulersinneqarneri, tassami saattuaqarfiit immikkoortuusut saattuaqassutsimik siunnersuinerup ersersimmagu, GA allappoq.
Naalakkersuisuugallartut taama annertutigisumik politikkikkut pisinnaatitaammata Sulisitsisut Peqatigiiffiata aamma tupigusuutigaa:
- Uanilu aperisariaqarpoq nutamik malittarisassanik aalajangersaasoqarsimanersoq? Sulisitsisut Peqatigiiffiat GA aperivoq.