Nuummit Paamiunut saattuartassat ilaneqartut
Aqutsiveqarfimmut pineqartumut ukiumut saattuartassiissutit 950 tonsiupput, saattuartassiissutigineqartullu septembarimi nungunneqarlutik.
Saattualeriffissap nutaap qanittukkut ammartussap tunitsivigineqarsinnaanissaa qulakkeerumallugu Naalakkersuisut aqutsiveqarfimmi saattuartassanik amerliipput, aalisartut ukiup sinneranut aalisarsinnaanissaat matumani aamma qulakkeerniarneqarluni, soorlu aamma Nuummi saarullinniarneq qaangiutilersoq. Naalakkersuisuugallartut nittartagaanni tamanna atuarneqarsinnaavoq.
Aalisarnermut akuersissuteqartarneq pisassiissuteqartarnerlu pillugit nalunaarut juulip qiteqqunnerani allanngortinneqarpoq, 3-sømilinut killeqartitsinerup avataani imartami nutaanik periarfissiisoqarluni.
Saattuartassanik amerliliinermi pisassiissutitut inassutigineqartut qaangerneqannginnerat Naalakkersuisuugallartut tusagassiorfinnut nalunaarumminni erseqqissaatigaat.
Sinerissamut qanittumi avatasiorlunilu saattuarniarnermi aqutsiveqarfimmi Nuuk-Paamiuni pisassiissutit 1.200 tonsiussasut inassutigineqarpoq.