Demokraatit: Inassutigineqartut aningaasaajaataapput
Saammaateqatigiinnissamut Isumalioqatigiissitap ukiut pingasut sinnerlugit sulereerluni isumaliutissiissummut saqqummiussaanut Demokraatit isumaat allanngunngilaq.
- Demokraatininngaanniit siullermiilli Saammaateqatigiinnissamut Isumalioqatigiissitaq pilersinneqarmat isumaqataasimanngilagut, aningaasat nunatta iluani atorneqarsinnaanissaat uagut piumasarinikuugatsigu, Randi Vestergaard Evaldsen oqarpoq.
Hammond isumaqataanngitsoq
Tamanna Saammaateqatigiinnissamut Isumalioqatigiissitap aallarniisuata Aleqa Hammondip tupaallannanngitsumik isumaqatiginngilaa.
Saammaateqatigiinnissamut tunngasut pitsaasumik ingerlariaqqinissamut pingaaruteqartuusut, taassuma erseqqissarpaa.
- Tamakku pingaartitat inuiaqatigiinni aningaasaannanngorlugit nalilersuutigineqarsinnaanngillat, Aleqa Hammond oqarpoq.
Suliniutit isumaqalerumaartut, taanna isumaqarpoq.
- Isumaqarpunga pingaaruteqartorujussuarmik Saammaateqatigiinnissamut Ataatsimiititaliap sulereernermi inassuteqaatai inuiaqatigiinni sunniuteqarluartussaasut tunniunneqarput, Aleqa Hammond oqarpoq.
Isumaliutissiissut Isumalioqatigiissitap siulittaasuata tullianit Dorthe Katrine Olsenimit Naalakkersuisunut tallimanngormat tunniunneqarpoq. Innersuussutinit arfineq marluusunit saqqummiunneqartut ilagaat utoqqatsertitsinissamik kissaat, tassanilu Randi Vestergaard Evaldsen aamma isornartorsiuivoq.
- Uani eqqartorneqartumi danskit ilaanngillat, taamaattumik itisileruminaappoq oqaatigiuminaallunilu kina utoqqatsissanersoq.
Utoqqatsertitsinissamik kissaat
Ineriartorneq eqqarsaatigalugu inuianni utoqqaanerit aqqusaarsimasaminnut atatillugu utoqqatserfigineqarnissartik pisariaqartikkaat, isumaliutissiissumi ersippoq. Tassani ilaatigut pinngitsaalisamik nuutsitaaneq pineqarpoq, danskit naalagaaffiannit Namminersorlutillu Oqartussanit utoqqatsissut ujartorneqarluni. Tamanna ingerlariaqqinnissamut pisariaqartoq, Aleqa Hammond isumaqarpoq.
- Inuiaat naalagaaffinngoriartorumalluta immitsinnut piumaffiginninnerput aammalu siunissami immitsinnut pingaartilluta kalaaliussuserput qitiutillugu ingerlariaqqinnissatsinnut inassuteqaatit avaqqunneqarsinnaanngillat.
Isumalioqatigiissitamut innersuussutaannullu aningaasanik atueqqinnissaq Demokraatit tapersersornavianngikkaat, Randi Vestergaard Evaldsen erseqqissaavoq:
- Aningaasat meeqqat atuarfiinut atorsinnaagaluartut meeqqeriveqarfinnut atorsinnaagaluartut Saammaateqatigiinnissamut atorneqarneri ajuusaarnartorujussuuvoq.
