Canadami angerlarsimaffeqanngitsut illuaraliuunneqartut

Angerlarsimeqarani aqqusinermi inuuneq  inissiaqarfimmilu inuit allat akornanni tattoqisaalluni najugaqarneq assigiinngitsorujussuupput.

Taamaammat angerlarsimaffeqanngitsut  initaariataaraangamik sungiussiniartarnerat ajornakusoortissinnaasarpaat.

Tamanna Nordvest territoriemi allaanerusumik aaqqiissuteqarnissamik misilinneqalerpoq. Illunik mikisunik utaqqiissaasumik aaqqissutissatut oqartussat sanaartortitsipput.

AAMMA ATUARUK Angerlarsimaffeqanngitsut unnuiffissaqaratik issersuup ataani silamiittariaqartut

Taakku 22 kvadratmeteritut angissuseqarput. Illuaqqani siniffeqarpoq, issiaveqarpoq, igaffeqarpoq perusuersartarfeqarlunilu.

Illuaqqat aasaanerani illuaqqanut piniariartartulluunnit illuaraannut assingupput, ukiukullu qiianartarnerujussua pillugu oqorsarluagaapput.

Illut illoqarfimmi illut allat akornanni sananeqarput, taamaalillutik najugaqartut avinngarusimasutut misigisimassanngillat.

AAMMA ATUARUK Angerlarsimaffeqanngitsunut containerit pillugit nalilersuisoqassaaq

Illoqarfimmi Whitehorsemi illuaqqat taamaattut tallimat sananeqarput taakkulu illoqarfiup naalagaaffiullu oqartussaanit kiisalu namminersortunit aningaasalerneqarput.

Illuaqqat kikkunnit tamanit atorneqarsinnaapput, najugaqartulli amerlanersaat nunap inoqqaavinit inigineqarnissaat oqartussanit naatsorsuutigineqarpoq.

Kommuneqarfik Sermersuup containerini inissiat 26-t Nuummi angerlarsimaffeqanngitsunut, suliffilinnut utaqqiisaasumik angerlarsimaffissatut ukiut marluk matuma siorna pisiarai. Januaarip aallartinnerani inissiat taakku affaata missaat atorneqarput.

AAMMA ATUARUK Nuummi angerlarsimaffeqanngitsunut containerini inissat affaat atorneqanngitsut