Canada: Angerlarsimaffeqanngitsut unnuiffissaqaratik issersuup ataani silamiittariaqartut
Ikiorsinnga. Iqalunni Nunavummilu sumiiffinni allani angerlarsimaffeqanngitsut taama oqarput.
Nunavummi sumiiffinni amerlasuuni 23-t 28-llu akornanni nalinginnaasumik ulluni makkuni issittarpoq, unnuaaneranilu 35-t tikillugit ississinnaalluni. Assersuutigalugu Iqalunni angerlarsimaffeqanngitsut ikiorneqarnissartik taamaammat pisariaqartippaat, kialaartumimi unnuiffissaaqanngikkunik qiullutik toqusinnaapput.
Angutit 45-t 50-llu missaanniittut Iqalunni angerlarsimaffeqanngillat, unnuiffissanullu ullut tamaasa orniguttarlutik, siniffiilli 20-iinnaammata amerlanerit inissaqarneq ajorput.
Unnuiffissat ima amigaataatigipput angerlarsimaffeqanngitsut ilaat Iqalunni napparsimmavimmut Qikiqtani Hospitalimut orniguttalersimallutik, tassani unnuiffissarsiortarlutik. Napparsimmaviulli ersarissumik maanna oqaatigaa napparsimmavik napparsimmaviusoq, napparsimasunullu taamaallaat naatsorsuussaasoq.
AAMMA ATUARUK Angerlarsimaffeqanngitsut issinneranit ilungersunartorsiorput
Angerlarsimaffeqanngitsut ilaat aalakoorlutik orniguttarnerat napparsimmaviup ilaatigut oqaatigaa, ilaallu nakuuserniartarmata sulisunilluunniit akornusersuisarmata napparsimmavimmit anisitaaginnartartut.
Iqalunni oqaluffiit eqaarsaartarfiillu angerlarsimaffeqanngitsunut ammarneqarnissaat siunnersuutigineqarpoq, taamaalinikkut unnuiffissaqartinneqarniarlutik. Tamannali suli iliuuseqarfigineqanngilaq.
Nunavummi naalakkersuisut inunnik isumaginninnermut ukiumut 400 millionit dollarinik, tassa 2 milliardit koruunit missaannik, immikkoortitsisarput, angerlarsimaffeqanngitsulli unnuiffissaannut apeqqut ukiut tamaasa utertuaannarluni.
Aningaasat 400 millionit dollarit tassaapput Canadami naalakkersuisut missingersuusiaasa sisamararterutaasa missaat.
AAMMA ATUARUK Naggueqativut angerlarsimaffeqanngitsut Montrealimi ornittagaqalersut
