Naggueqativut angerlarsimaffeqanngitsut Montrealimi ornittagaqalersut
Naggueqatigiit inuit angerlarsimaffeqanngitsut Montrealip qeqqani illoqannginnersami Cabot Squaremiittarput, tassaniikkajuttarputtaaq ikiaroornartumik pinnngitsuuisinnaanngitsut.
Inuit tassaniittartut persuttaasarput inuillu tassaniittut aniguineq ajorput.
Montrealimi oqartussaasut ukiut marluk matuma siorna aalajangerput illoqannginnersami Cabot Squaremi iliuuseqartoqassasoq.
Illoqannginnersaq millionit koruunit atorlugit iluarsaanneqarpoq.
Sulilu pingaarnerusut, tassalu illoqarfimmi pisinnaasallit pissarsiarineqarput, naggueqatigiit inuit aamma qallunaat ulluinnarni illoqannginnersamiittartunik attaveqarsinnaasut taakkua nakorsanik allatigullu pisariaqartinneqartunik attaveqartarlutik.
Suliniaqatigiiffinneersut namminneq piumassutsiminnik suleqataasut 40-t illoqannginnersami naggueqatigiit inuit sammisassaqartinneqarnissaannik ornittagaasalu eqqiluitsuunissaannik suliaqarput. Ornittakkami tassani ukkusissanik qiperuinissamut ilinniartoqarsinnaavoq inuit timersuutaannik timersortoqarluni aammalu torlussortoqarsinnaalluni.
Ornitakkami cafeqarpoq tamulugassanik agguaassisoqarsinnaalluni.
Illoqannginnersami ornittagaqalerneq angerlarsimaffeqanngitsorpassuarnut iluaqutaallunilu nuannaarutaavoq, tassani naggueqatigiit inuit naapeqatigiissinnaapput tassanngaanniillu qanittumiittunut nerisassanik kissartutornissaannut unnuiffigisinnaasaannullu innersuunneqarsinnaallutik.
Illoqannginnersaq tusaamanerlunneqarsimasoq Montrealimi naggueqatigiinnut inunnut angerlarsimaffeqanngitsorpassuarnut nuannersumik ornittaganngorpoq.