Angerlarsimaffeqanngitsut issinneranit ilungersunartorsiorput
Naggueqatigiit inuit angerlarsimaffeqanngitsut illoqarfissuarmi Montrealimi aamma illoqarfinni Canadap kujasinnersortaaniittut amerlapput. Illoqarfissuarmi Montrealimi angerlarsimaffeqanngitsut unnuiffigisinnaasasannik marlunnik peqarpoq taakkuali maannakkut ingerlanneqarnerat aningaasatigut ajornartorsiuteqarput.
Angerlarsimaffeqanngitsut ornittagaanni oqaluffimmi St. Stephen Open Housemi Montrealip qeqqaniittumi imerajuttunik ikiaroortartunillu ullormut 150-nik kissartunik nerisitsisoqartarpoq.
AAMMA ATUARUK Naggueqativut angerlarsimaffeqanngitsut Montrealimi ornittagaqalersut
Oqaluffik angerlarsimaffeqanngitsut ornittagaat matuneqarpoq tuniniarneqartusaallunilu, taamaattumik angerlarsimaffeqanngitsut siunissami sumunnartassanersut qularnarpoq.
Angerlarsimaffeqanngitsut ornittagaat unnuisarfiillu suliniaqatigiiffinnit pisortanit tapiiffigineqarneq ajortunit ammaneqartarput, taakkualu aningaasanik amigaateqarajuttarput taamaattumillu akunnerni arlaqartuni ullormut mattoqqasariaqartarlutik
Nunavummi Eqalunni Angerlarsimaffeqanngitsut atugaat aammma imaannaanngitsuusut tv-qarfimmi APTN TV-mi oqaluttuarineqarpoq.
AAMMA ATUARUK Sermersooq Containerinik angerlarsimaffeqanngitsut inissaannik pisisoq
Angutit angerlarsimaffeqanngitsut unnuiffigisartaani siniffiit naammanngimmata angerlarsimaffeqanngitsut ilai natermi sinittariaqartarput.
Angerlarsimaffeqanngitsut ornittagaat ullukkut matoqqasarpoq, naak 20-inik issikkaluallaraangat nillernerugangalluunniit.
Angutit 30-it missaannik amerlatigisut Eqalunni aqquserni angalasariaqartarput ornissinnaasaminullu isertarlutik.
Eqalunni angerlarsimaffeqanngitsoq ataaseq ukiumut toqusartoq, tv-qarfimmi APTN-imi oqaluttarineqarpoq.
