Angunnguaq Larsen: - Isiginnaagassiami peqataalluni misigisassarujussuuvoq
- Svenskit uuliamik assartuutaat umiarsuaq saassunneqarpoq ilaasullu aallarunneqarlutik. Piffissamilu tassani Issittumi Siunnersuisoqatigiit Tasiilami ataatsimiipput oliep issittumi inerteqqutaanera ilaatigut eqqartorlugu, islandimiu Kidda Rokk isiginnaagassiami "Tynd is"-imi filmiliornermi aqutsisut ilaat oqarpoq. "Tynd is" aappaagu svenskit kanalianni TV4-ami takuteqqaarneqassaaq.
Isiginnaagassiaq nangeqattaartoq nunasiaataasimanermut aamma tunngasoq, isiginnaartitsisartup Angunnguaq Larsenip oqaatigaa:
- Danmark immaqa saqqummiutilaaraat nunasiaataasimanerup kingorna qanoq kalaallinut pissusilersortarnerat tassani takutimmassuk. Tikkuartuinngikkaluarluta kisianni pissutsit takutippaat qanoq innersut, Angunnguaq Larsen oqarpoq.
Isiginnaagassiaq nangeqattaartoq nunatsinni pisuusaartitaasoq silap pissusaata allanngoriartorneranut, politkkimut kalallillu namminiilivinnissaanut ilaatigut tunngavoq.
Ukiuni tallimani ineriartortoq
Filmiliornermi aqutsisup Søren Stærmosep, Mænd der hader kvinder"-imit kiisalu "Pigen der legede med ilden"-mit ilisimaneqaateqartup, oqaluttuaq isumassarsiaraa. Taannami nunatsinni angalatuujuvoq. TV-kut nangeqattaartuliaq ukiuni tallimani producereqatini Kidda Rokk peqatigalugu suliaraa.
Nangeqattaartup oqariartuutaa pingaaruteqartoq, Kidda Rokk isumaqarpoq:
- Kalallit Nunaat naqisimaneqarnikuuvoq, tamannalu tamanit oqaluuserineqartariaqarpoq. Kiisalu sermersuup aakkiartornera aamma eqqartorneqarnissaa pisariaqarpoq, Kidda Rokk oqarpoq neriullunilu nangeqattaartuliaq oqallissaariumaartoq.
- Neriuppunga isiginnaartut nuannarissagaat. Kiisalu silap pisussaata allanngoriartornera pillugu ajornartorsiutit naapittakkagut eqqarsaatigineqalerumaartut.
Isiginnaartitsisartumullu Angunnguaq Larsenimut peqataaneq misigisassarujussuvoq uppernanngingajattutut misiginartoq:
- Assut nuannersorujussuuvoq, inuit misilittagallit suleqatigalugit taavalu pikkorissupilussuugamik tamarmik. Ulloqartarpunga tupigusullunga eqqarsarlungalu: "Kakkaak, tamaaniuna susunga?", Angunnguaq Larsen oqarpoq.
Nukâka Coster-Waldau, Hans Jukku Noahsen, Kimmernaq Kjeldsen aamma nipilersortartoq Angu Motzfeldt nangeqattaartuliami peqataasut aamma ilagaat.
"Tynd is"-ip reklamea uani takuuk:
