Kujataani immap naqqatigut kabelimik iluarsaassineq aallarteqqinneqartussanngortoq
Nunatta kujataani imaatigut kabelip iluarsaanneqarnera sapaatiuppat aallartinneqassaaq, silalu ajunngeriarpat kabelip iluarsaanneqarnera sisamanngornermi naammassineqarsinnaassasoq, Telepostimi pisortaaneq, Kristian Reinert Davidsen KNR-imut taama ilisimatitsivoq.
Paasissutissat
- Imaatigut kabelip avannaani januaarimi ajoqusernera Sisimiunit kujammut 30 kilometerinik ungasitsigisumiippoq.
- Aappaa Sisimiut avannaani 70 kilometerinik ungasitsigisumiippoq.
- Ajoqusernerit pingajuat Nunatta kujataani decembarimi pivoq.
- Imaatigut kabeli 300-400 meterisut ititigisumi immap naqqaniippoq
- Kujataani immap naqqatigut kabelip umiarsuarmit iluarsaanneqarnerata naammassineqarnissaa aalajangiupparput, silamillu ilimasaaarut naapertorlugu tamanna iluatsissinnaarpasippoq, Telepostimi pisortaq oqarpoq nangillunilu:
- Kabelimik iluarsaassinerup sapaatiuppat aallarteqqinneqarnissaa naatsorsuutigaarput, sapaatillu akunnerata tulliani sisamanngornermi naammaasineqarnissaa naatsorsuutigaarput iluarsaassinerlu naammassineqareerpat iluarsaassineq maajip aallaqqaataata tungaanut unitsikkallarneqassaaq. Tamatuma nalaani silaginnerunissaa ilimagineqarmat.
Silalu apeqqutaalluni umiarsuaq kujataanit Sisimiunukartinneqassanersoq kingorna aalajaaffgineqassasoq pisortaq aamma oqarpoq.
Kujataani silarlunnera kinguaattoortitsisoq
Kujataani silap ajornera pissutigalugu iluarsaassineq kinguaattoorfiuvoq tamannalu aallaavigalugu Telepostimi pisortaqatigiit tallimanngormi ualikkut ataatsimiilpput.
Candamimiut imaatigut kabelilerissutaata umiarsuup Horizon Enablerip imaatigut kabeli iluarsaanniarsaraa, suliarlu akisoorujussuuvoq. Umiarsuup suliaqartinnera ullormut millionit affaanit akeqarpoq iluarsaassinermilu aningaasartuutit 45-t 50 millionit koruuninngorsinnaanissaat, Kristian Reinert Davidsenip nalilerpaa.
Aningaasartuutilli amerlaneruleratarsinnaapput, Kristian Reinert Davidsenilli erseqqissaatigaa aningaasartuutit amerlanerussappata aningaasat suminngaannissanersut maannamut oqaatigisinnaakkikkallarlugu.
- Akisunerunissaa soorunami neriuutiginngilarput, kisiannili akisunerulissagaluarpat tamanna atuisunit aallertoqarnissaa allaqqunneqarsinnaanavianngilaq, tamannali suli aalajangiiffiginngilarput kisiannili iluarsaassinermut akiligassaq akilerneqartussaassaaq, Telepostimi pisortaaneq, Kristian Reinert Davidsen oqarpoq
Imaatigut kabelimi ajoqutit katillugit pingasuupput. Sisimiut kujataaniittoq marsip qeqqani iluarsaanneqarpoq, teknikerilli iluarsaassinerminni Sisimiunit 70 kilometerinik avannarpasitsigisumi kabelip aamma kittorarneqartoqa paasivaat. Taannalu suli iluarsaanneqanngilaq.
Kilisaat imaatigut kabelip Sisimiut kujataani kittorarneranut pisuusoq, Kristian Reinert Davidsenip KNR-imut oqaatigaa.
Taamaammat Tele-Postip eqqartuussissuserisua umiarsuaatileqatigiiffimmut, kilisaammik piginnittumut atassuteqalerpoq, Kristian Reinert Davidsenilli tamanna itinerusumik oqaaseqarfigerusunngilaa.