Russit aallartitaat: Ukrainemi sorsukkunnaartoqassappat isumaqatigiinniartoqartariaqassaaq
Ukrainemi sorsunneq soraassappat nunat killiit Ruslandilu isumaqatigiinniartariaqassasut, russit atorfilittaasa ilaat Rodion Mirosjnik oqarpoq.
Russit namminneq oqarnerat naapertorlugu taanna Kyivimi aqutsisut pinerlunniartarnerannik akiuiniarnermut aallartitaasoq, russit nutaarsiassaqartitsiviat Tass allappoq.
- Isumaqatigiinniartoqarumaarpoq, tamanna avaqqunneqarsinnaanngilaq. Aaqqiagiinngissutit isumaqatigiinniarnikkut qaangerniarneqartarput. Maleruutiasunik isumaqatigiinniarsinnaanngitsugut miserratigineqarsinnaanngilaq, Mirosjnik oqarpoq.
Ukrainep nunanut killernut maleruutiasutut inissisimalersimanera, russit atorfilittaasa ilaata matumani pivaa.
Piffissamili qaninnermi isumaqatigiinniartoqalernissaa ilimagineqassanngitsoq, Mirosjnikip oqaatigaa.
- Nunat killiit isumaqatigiinniartoqalernissaattut isikkoqanngillat. Isumaqatigiinniarsinnaanngikkallarlutik oqaatigaat, taanna oqarpoq.
Ruslandip Ukrainemik siorna 2022-mi februaarimi saassussilerneraniilli unittooqqasoqalersinnaanera arlallit mianersoqqussutigaat.
Nunat killiit sakkussianik Ukrainep illersornissaqarfianut milliardilikkuutaanik nalilinnik tunissuteqarsimapput, Ukraine imminut illersorsinnaaniassammat akisillunilu saassussisinnaaniassammat.
Sorsuffilli sorsunnerup aallartinneraniilli allanngungaarsimanngilaq.
Ukrainep 18 procentiata missaa russinit tiguarneqarsimasoq, Ukrainep maannamut oqaatigisimavaa, Ruslandilu nunap immikkoortuanit taakkunannga aatsaat tunuarpat isumaqatigiinniarnernut ornigunniarluni.
