Zelenskyj FN-imi: Ruslandip nunat tamalaat inuussutissanik amigaateqarnerat sakkuliuppaa

Nunat tamalaat inuussutissanik amigaateqarnerat sakkuliullugu, Ruslandip Ukrainemi nunap immikkoortuisa tiguarsimasaasa akuerineqarnissaat Ruslandip sulissutigigaa, Ukrainep præsidentiata Volodymyr Zelenskyj-p Naalagaaffiit Peqatigiit New Yorkimi ataatsimeersuarneranni marlunngornermi oqalugiarami ilaatigut oqaatigaa.

Ruslandip nukissiuuteqarneq aamma sakkuliukkaa, Zelenskyj-p ilanngullugu oqaatigaa.

Ukrainemi sorsunneq soraarpat nunap sunaluunniit nunamik allamik saassussinnginnissaa pingaaruteqartoq Ukrainellu tamanna sukataarutigigaa, Ukrainep præsidentiata oqaatigaa.

Ruslandip ukrainemiut meerartaannik aallarussisarnermigut inuiannik toqoraasoq, Zelenskyj-p ilanngullugu oqaatigaa.

- Meeqqat Ruslandimut aallarunneqartut Ukrainemik asissuinissamik ilinniartinneqartarput, ilaquttaminnullu attavii kipitinneqartarlutik. Tamanna inuiannik toqoraaneruvoq, Zelenskyj Naalagaaffiit Peqatigiinni oqaluagiarami ilaatigut oqarpoq.

Ruslandip - Naalagaaffiit Peqatigiit Isumannaallisaaniaqatigiivini ataavartumik ilaasortaasup - atomimik sakkussiaqarnera toqqissisimananngitsoq, Ukrainep præsidentiata aamma oqaatigaa.

- Peqqarniisaarniat atomimik qaartartorsuaqaqqusaanngillat, taanna oqarpoq nangillunilu:

- Rusland assigiinngitsunik sakkulersorpoq, uagutsinnuinnarlu atorneqanngillat, aamma ilissinnut, Volodymyr Zelenskyj oqarpoq.