Ruslandimut isertut tatiginassusermik isumaqatigiissummik atsiortitaasalissasut
Ruslandip naalagaaffimmi pissutsinut ministeriaqarfiata angalanermut inatsit suliarinialeruttorpaa, tassa nunami allaminngaannersut tikittut "tatiginassusermik isumaqatigiissummik" atsiortalissapput.
Ruslandimi politikkerinut taamaaasillutik tatiginninnginnermik isumaqatigiissutitigut takutitseqqusaajunnaarput.
Ruslandimi nutaarsiassaqartitsivik Tass taama allaaserisaqartoq, nutaarsiassaqartitsiviup Reutersip issuarpaa.
Inatsit taanna Ruslandimi inuiaqatigiinnut soqutiginaateqarsinnaasunut illersuisuussasoq, nutaarsiassaqartitsivik Tass allappoq. Nutaarsiassaqartitsiviup inatsisissamik siunnersuut takusimavaa.
Paasissutissat Ruslandimeersut Reutersip uppernarsarsinnaasimanngilai.
Ruslandip nunamut namminermut ministeriaqarfiata suliaq, Reutersimut aamma oqaaseqarfigisimanngilaa.
Inatsisinik unioqqutitsinerit qanoq kinguneqarsinnaanersut, Tassip aamma nassuiaateqarfigisimanngilaa.
Inatsit atuutilersinneqassappat, Ruslandip inatsisartuini Dumami akuersissutigineqaqqaartariaqassaaq.
Ataatsimiititaliami tamatuma kingorna oqaluuserineqarlunilu naliliiffigineqareeriarpat, Ruslandip præsidentiata Vladimir Putinip naggataagut atsiortussaassavaa.
