Danmarkimeersoq akilersilluni Ukrainemi sakkutuujusutut pasisaalluni Ruslandimi unnerluussaasoq
Nunanit allaneersut 523-t, taakkunannga Danmarkimeersoq ataaseq, akilersillutik Ukrainemi sakkutuujupput, Danmarkimeersullu amerlanerusinnaapput.
Ruslandip misissuisartuisa tusagassiisartui taama ilisimatitsisut, Ruslandip naalagaaffiata nutaarsiassaqartitsivia Tass allappoq.
Nunat assigiinngitsut 44-t innuttaasui akilersillutik Ukrainemi sakkutuujusutut pasineqarlutik unnerluutigineqartut nalunaarutigineqarpoq, unnerluutigineqartut Belgiameersuullutillu USA-meersuullutillu Italiameersuunerarneqarlutik, soorlu aamma Danmarkimeersuusoqartoq.
Nunanili ataasiakkaani qassit unnerluutigineqarnersut ilisimaneqanngilaq.
Pasineqartut eqqartuussivimmi najuutinngikkaluarlutik unnerluutigineqarput, tassa russinit tigummigallagaanngillat.
Danmarkimeersut Ukraine sinnerlugu Ukrainemi sorsoqataajumasut arlaqartut, Ukrainemi 2022-mi februaarip ulluisa 24-anni sorsuttoqalersimatsiaannartoq oqaatigineqarpoq.
Qassilli Ukrainemi maanna sorsoqataanersut ilisimaneqanngilaq.
Danskisut innuttaassusillit Ukraine sinnerlugu sorsoqataasinnaanissaannut inatsisitigut inerteqquteqanngitsoq, ministeriunerup Mette Frederiksenip (S) sorsunnerup aallartisimalaarnerani oqaatigaa.
