Ruslandip issittumi imartat isumaqatigiinniutigerusukkai
Issittumi imartat Nunatta, Danmarkip Ruslandillu Naalagaaffiit Peqatigiinnut pigiumavaat. Ruslandilu imartat killeqarfilerallarnissaannut maanna isumaqatiginninniarusuppoq.
Aamma atuaruk Nunatta Danmarkillu Qalasersuaq imartallu annertoorsuit piumavaat
Nunatta Danmarkillu ataatsimoorlutik Qalasersuarmut imartanullu Nunatta eqqaaniittunut tamaanilu isumalluutinut piginnituujumanertik Naalagaaffiit Peqatigiit nunarsuit toqqaviinut ataatsimiititaliaannut aggustimi saqqummiuppaat.
Nunalli arlallit imartat taakku aamma pigiumavaat. Ruslandip Qalasersuaq imartarujussuillu Nunatta Danmarkillu piumasaannut ilaatigut qallisut piumavai.
Taamaammat Naalagaaffiit Peqatigiit nunanit piumasarineqartunut qalleraattunut suliarinninnginneranni Rusland Danmarkimut isumaqatigiinniarusuppoq.
Aamma atuaruk Issittup imartaanik piginnittuulernissamik Rusland piumasaqaateqartoq
Imartanilu killeqarfiugallartussaliiniarluni Danmarkimut isumaqatiginninniarnissaq isumatusaarnerusoq, Ruslandip avatangiisinut ministeriata, Sergei Donskoyip Ruslandip præsidentianut, Vladimir Putinimut ataatsimeeqateqarnermini oqaatigaa.
Aamma atuaruk Danskit tusagassiorfii: Russit piumasaqaataat Danmarkimut nalunaarnertut isigisassaavoq
Taamaaliornerlu Naalagaaffiit Peqatigiit piumasaqaatinik sukkanerusumik pitsaanerusumillu suliaqarnerannik kinguneqassasoq ministeri isumaqarpoq.
- Imartani killeqarfiliigallarnikkut nunarsuup pissusaanik misissuinissat eqqortumik suliarineqarnissaat qulakkeersinnaavarput, kikkullu imartanut oqartussaasuussanersut pillugu aporaanneq ingalassimatillugu. Ukiaruinnartorlu isumaqatiginninniartoqarsinnaappat pitsaassaaq, Sergei Donskoy russit naalakkersuisuisa ataatsimiinneranni oqarpoq.
Nunatta, Danmarkip Ruslandillu imartat piumasaat aalisagarpassuaqarsorineqarput atortussiassarpassuaqarsorineqarlutillu. Taamaammat kikkut imartanut oqartussaasunngornissaat apeqqutaasupilussuuvoq.
Nunat imartanut piumasaat ukiut arlallit suliarineqarsinnaapput. Piumasallu suliarineqarnerisa kingorna nunat imartanik qalleraattunik piumasallit killeqarfiliinissamut namminneerlutik isumaqatigiinniassaput.
