Nunatta Danmarkillu Qalasersuaq imartallu annertoorsuit piumavaat
Nunatsinnit Danmarkimiillu aallartitat naalagaaffeqatigiit sinnerlugit Nunatta sineriaani immap naqqani nunaviup toqqavittaa nunatsinnut atasuunerarlugu piumasaqaammik Naalagaaffiit Peqatigiit toqqavinnut ataatsimiititaliaannut saqqummiussipput.
Imartat Nunatta kujataaniittoq, avannaani kangianiittoq, avaannaaniittorlu tassani pineqarput, taakkunanilu atortussiassarpassuaqarsorineqarpoq aalisagarpassuaqarsorineqarlunilu.
Taamaammat Nunarput Danmarkilu imartanut annertoorsuarnut Naalagaaffiit Peqatigiit toqqavinnut ataatsimiititaliaannit oqartussaasunngortinneqassappata sunniuteqarujussuassaaq.
Aamma atuaruk Qalasersuarmik piginnittussaanermik piumasaqaat danskit partiivisa akornanni isumaqatigiissutaavoq
Qilanaartut
Inuussutissarsiornermut, suliffeqarnermut, niuernermut nunanullu allanut tunngasunut naalakkersuisoq, Vittus Qujaukitsoq piumasaqaat pillugu ukiuni pingasuni tulliuttuni sulinissamut qilanaarpoq.
- Maanna kinguneqartussamik suliarineqarnissaat Toqqavinnullu Ataatsimiititaliarsuarmik ataatsimeeqateqarnissaq malitsigisaannillu nunat allat piumasaqaatitsinnut qalleraattumik piumasaqartut isumaqatigiinniarnissaat qilanaarluta utaqqissavarput, Vittus Qujaukitsoq oqarpoq.
Aamma atuaruk Issittup imartaata naqqa siunissaq pillugu ilungersuutigineqartoq
Aamma danskit nunanut allanut tunngasunut ministeriat, Kristian Jensen Nunatta Danmarkillu piumasaqaataannut iluarisimaarinnippoq.
- Nunarsuarmioqatigiit nunat killeqarfii ilisimatuussuseq inatsisillu tunngaviusut aqqutigalugit suleqatigiinnerata annertuumik tapersersornerata ersersinnissaa pingaartuuvoq. Issittumi kinguneqaataasumik eqqissisimasumik peqataanissaq aalajangiisuulluinnarpoq, Kristian Jensen oqarpoq.
Unammillernartoq
Piumasaqaatilli akuerineqarnissaa naalagaaffeqatigiinnut unammillernassaaq. Tassami Canadap, Ruslandip, Norgep Islandillu imartat pineqartut arlaqartut aamma oqartussaaffigilerusuppaat.
Taamaammat Nunatta Danmarkillu piumasaqaatiminnut akineqarnissartik ukiuni arlalinni utaqqisariaqassavaat.
Aamma atuaruk Issittup imartaanik piginnittuulernissamik Rusland piumasaqaateqartoq
Imartat piumasarineqartut qasertumik nalunaaqutserneqaqqapput