Rusland aningaasanik innuttaassuseqalernissamillu nunasinianut neriorsuuteqarnikkut sakkutuunngortitsiniarsarisoq
Ruslandimut nunasiniat aningaasanik nunaqalernissamullu uppernarsaammik tunineqarnissaannik neriorsorlugit sakkutuunut ilanngutsinniarneqalersut, tuluit illersornissamut ministereqarfiat Twitterimi allappoq.
- Namminneq piumassutsiminnik sakkutuunngorusuttunik 400.000-nik russit Ukrainemut sorsunnerminni amigaateqaramik taama pilerinarsaapput, tuluit illersornissamut ministereqarfiat allappoq.
Ruslandimut nunasiniat sakkutuunngorpata, taakku aningaasanik 15.000 koruuninik aallarniutigalugu tunineqassasut kingornalu qaammammut 28.000 koruuninik aningaasarsiaqalissasut neriorsorneqarput.
- Aningaasarsiat taama amerlatigisut neriorsuutigineqarneranni nunasiniat ilaat sakkutunngorusussinnaakutsoorput. Taakkulu sakkutuunngorpata Ukrainemut sorsunnermi atorneqarnissaat ilimanarluinnarluni, tuluit illersornissamut ministereqarfiat aamma allappoq.
Sakkutuunngorusuttunut neriorsuutit ilaat tassaavortaaq, nunasiniaraanni tamanna pilertornerusumik pisinnaasoq, tassa ukiup ataatsip ingerlanerani nunasiat sakkutuunngorusuttut akuesissummik pisinnaallutik. Ruslandimut nunasiniat akuersissummik pinissaminnik nalinginnaasumik ukiuni tallimani utaqqisinneqartarput.
