Siunnersuisoqatigiinni qullersap Kalaallit Nunaat Savalimmiullu siunnersuisoqatigiinni pissaaneqarnerulertikkusukkai
Nunat Avannarliit siunnersuisoqatigiivini Kalaallit Nunaat Savalimmiullu nunatut namminersortutut sassarsinnaanissaminnut pisinnaatitaaffeqassapput.
Taama siunnersuisoqatigiinni qullersaq Karen Ellemann isumaqarpoq. Donald Trump USA-mi præsidentiugallartillugu kissaatigineqartup piviusunngortinneqarnissaa ajornartuusariaqanngitsoq, Politiken-imut oqarpoq.
- Nunarsuarmiuni politikkikkut maanna pissutsit takutikkaat, Nunat Avannarlermiut ataatsimoorsinnaanerat aqutsilluarsinnaanerallu qanoq pingaaruteqartigisoq qularutissaanngitsoq, Karen Ellemann oqarpoq.
Savalimmiut, Kalaallit Nunaat Ålandilu tamakkiisumik ilaasortanngorsinnaalerniassammata, Helsingforsimi isumaqatigiissutip allanngortinneqarnissaa naalagaaffiup taperseraa, Nunanik Avannarlernik suleqateqarnermut ministeri Morten Dahlin (V) oqarpoq.
Helsingforsimi isumaqatigiissutip allanngortinneqarnissaa kissaatigalugu, ministeriunerup Mette Frederiksenip(S) Sverigemi, Norgemi, Finlandimi Islandimilu ministeriuneroqatini siorna allaffigereerpai.
Allannguut “inatsisinut tunngasutigut naammassiuminaallisinneqarsinnaasoq”, sulialli unitsinneqaatigissanngikkaa, Karen Ellemann oqarpoq.
Inatsisitigut misissuisoqangajalersoq
Kalaallit Nunaat, Savalimmiut Ålandilu siunnersuisoqatigiinnut ilaasortannguissappata sunik ajornartorsiuteqalersitsisinnaanerata inatsisitigut misissuivigineqarnissaa, Nunani Avannarlerni naalakkersuisut qaammatip massuma aallartisimalaarnerani aalajangiiffigigaat, Politikenip allaaseraa.
- Inatsisitigut misissuisoqarnissaanik sulisoqaleruttorpoq, taammaattoqarnerali nutarsakkamik naligiinnerusumillu nunat avannarliit suleqatigiinnerinut, politikkikkut tapersiinissatsinnut akornusiissanngilaq, taama Morten Dahlin Ritzauimut allakkatigut oqaaseqaateqarpoq.
Kalaallit Nunaata Nunani Avannarlerni siunnersuisoqatigiinnut peqataasarnini unitsikkallaraa siorna paasinarsivoq.
Nunani Avannarlerni siunnersuisoqatigiinni svenskit siulittaasuata, ilaatigut illersornissamut politikki pillugu ataatsimiittoqarnissaanut Savalimmiut, Åland Kalaallit Nunaalluunniit aggersarneqarsimannginnerat peqqutaasoq, taamani Naalakkersuisunut siulittaasuusoq Muté B. Egede oqarpoq.
Maanna aamma Kalaallit Nunaanni naalakkersuisut siulittaasuata Jens-Frederik-Nielsenip nunat avannarliit suleqatigiinneranni ataatsimeeqataajumajunnaarnissaminut piareersimasoq allaqqavoq.
Nunat avannarliit suleqatigiinnerannut Nunat Avannarliit Siunnersuisoqatigiivi inatsisiliornermut qitiulluinnartuupput, 1952-imilu pilersinneqarluni. Siunnersuisoqatigiillu Danmarkimiit, Finlandimiit, Islandimiit, Norgemiit, Sverigemiit, Savalimmiuniit, Kalaallit Nunaanniit aamma Ålandimiit toqqakkanik 87-inik ilaasortaatitaqarpoq.
Nunat Avannarliit Siunnersuisoqatigiivini ilaasortat ukiumut marloriarlutik katerittarput, tassani pisut pillugit kissaatigineqartut, nunat avannarliit naalakkersuisuisa aaqqiissutissamik ujartuinissaat pillugit aalajangeeqatigiittarlutik.
