Runderful Nuummeersut 550 kilometeri arpapput
Marco Leibhardt siulliulluni The Speed Projectimi Nuup ilaani Qinngorpumi arpalluni arfininngornermi ullaassakkut sisamanut aallarpoq. Arpanneq annertusisamik stafetterneruvoq pilersaarutit malillugit ataasinngornerup unnuaani naammassissalluni. Arpattup ataatsip 91,5 kilometeri arpassavaa anguniarneqarporlu iligiit 550 kilometeri nalunaaquttap akunnerisa 43-t iluanni arpassagaat.
AAMMA ATUARUK Imaannaanngitsuliortoq: Orla maajimi 600 kilometeri arpappoq
Uiloq Mathæussen Runderful Nuummiit The Speed Projectimi 550 kilometerimut Los Angelesimiit Las Vegasimut arpannermi marsimi peqataasussaagaluarpoq. Tassani iligiit Australiameersut peqataaffigisussaagaluarpai. Nunanilli tamalaaneersut arpaannissaraluat covid-19-ip akimmisippaa.
- Upernaaq atatiinnarlugu 50 kilometeri arpaqatigiinnikuuvugut pitsaasumillu naammassinnittutut misigaluta. Arpaqatikka aperaakka uagut nammineq maani Nuummi The Speed Project ingerlatiinnarsinnaannginneripput tamarmillu erngerlutik akuersipput, Uiloq Mathæussen Runderful Nuummeersoq oqarpoq.
Timip qisuariaatissaa
Arpaqataasut arfinillit sungiusarluarsimasuupput. Taakku ilagaat Orla Isaksen Mølgaard maajip qaammataani 600 kilometerinik arpattoq.
- Maanna qasuerluareerpunga. Taamaallaat pissanngatigaara timi qanoq qisuariarumaarnersoq sinnakilluta arpaqattaarnitsinni, Orla Isaksen Mølgaard oqarpoq.
Peqataasut arpaffissatik oqaluusereqqissaaraat KNR-ip sisamangornermi unnukkut naapisimaarpai.
- Taama sivisutigisumik arpattussaagatta pingaaruteqarpoq arpaffigisatta assigiiaannginnissaa. Taamaattumik arlaleriarluta arpaffigisarput allanngortittassavarput ilimanarami naggataatigut qasussasugut taamaasineranilu qummukajaaqanngitsukkut arpannissaq pingaaruteqarluni, Uiloq Mathæussen oqarpoq.
The Speed Project Nuummi pisoq ataasinngornerup ullaassaani naammassissagatinneqarpoq. Arpaqataasut tassaapput: Uiloq Mathæussen, Marco Leibhardt, Mika Lyberth, Inuk Møller, Orla Isaksen Mølgaard aamma Jonas Jensen.
