Imaannaanngitsuliortoq: Orla maajimi 600 kilometeri arpappoq

Ikinngutaasut suleqataasullu Orla Isaksen Mølgaard Nuutoqqami pingaartorsiutigaat 600 kilometeri arpareerluni apuummat
Allattoq Noah Mølgaard
maajip 31-at 2020 14:49

Qatanngutigiit imminnut unammillernerat aallarniutaavoq oqaluttuarisaanermut ilannguttumik arpattoqarneranut sapaammi nalunaaqutaq ataasinngulernermi naammassisumut. Maajip qaammataani Orla Isaksen Mølgaard 600 kilometeri arpappoq arpannerminilu kilometerit qulit kingulliit arpattartoqatini peqatigalugit arpareerluni Nuutoqqami ingerlaannaq imaanut pissippoq.

- Pilersaarutaaqqaaraluarpoq maajimi 405 kilometeri arpassasunga. Qatanngutigali oqarpoq maajimi 500 kilometeri arpassalluni. Taava aalajangerpunga uanga 600 kilometeri arpassallunga, Orla Isaksen Mølgaard innaallagisserisunngorniartuusoq oqarpoq.

Isorartussuseq 600 kilometeri sineriammut siaaraanni tassaavooq Nuummiit Ilulissat avannaani Alluttoq tikillugu isorartussuseq.

Suli takinerusumut

Orla Isaksen Mølgaard sisamanngornermi unnukkut arpareerluni 590 kilometerimut killippoq unnullu taanna aamma KNR malinnaavoq. Eqqaaneqareersutullu kilometerit qulit kingulliit sapaammi arpappai kiateeraatalu tunuani allaqqavoq #600 kilometer. Arpaqatigisagaa Jonas Jensen kiateeraqarpoq tunuatigut allannilik #sapinngilat.

- Qaammatip ataatsip matuma siorna aallartikkama pissanganarpoq. Nalunarpormi naammassisinnaajumaarneriga. Ullormut qanoq issusera maluniarluartarpara. Ullumikkut aamma imminut oqigineruvunga ullut marluk arpanngikkallarnikuugara taamaasillunga tillernera qaffatsilluarsinnaanerullugu, Orla Isaksen Mølgaard maajimi ullut amerlanerit 21 kilometeri missaliorlugu arpaqattaartoq oqarpoq.

Maanna sapaatip akunnera arpanngikkallarniarpoq tamatumalu kingorna Qeqertarsuaq Race piareersarfigissallugu. Siunissaq ungasinnerusoq eqqarsaatigalugu qaammatip ataatsip ingerlanerani suli takinerusumut arpakkusussinnaavoq.

- Isumaliutigaara aappaagu qaammatip ataatsip ingerlanerani 1.000 kilometeri arpannarniarlunga. Atagu takussavarput taamanikkussamut taama takitigisumut arpannissamut kajumissuseqarluassanersunga, Orla Isaksen Mølgaard oqarpoq.

Maajimi sila atoruminarpoq Nuummi ullut amerlanngitsut taamaallaat siallerlunilu anorlermat qiianarlunilu. Ullulli amerlanerit sila atoruminartarpoq.

- Apuulluni nuanneqaaq aamma massakkut arpakatakkama, Orla Isaksen Mølgaard naggasiivoq, ikinngutit ilaquttallu erfalasuaqqanik aalaterisut ilaallu Facebookimi toqqaannartumik takusassiisut.