Rubinisiornissamut akuersissutip sapaatit-akunneranni uani aalajangiiffigineqarnissaa naatsorsuutigigaat
LNS-Greenlandip TNGG-p akiliisinnaajunnaarnerata kingorna pigisai pisiarerusuppai, rubinisiorfimmullu akuersissummik qanittukkut tunineqarnissani maanna neriuutigalugu. Pisortaq Gunnar Moe taama oqarpoq.
- Kalaallit Nunaanni oqartussat ingerlaavartumik oqaloqatigaagut, rubinisiorfiullu qanoq ingerlariaqqinnissaa pillugu ulluni qaninnerni paasisaqassalluta naatsorsuutigaarput.
Ingerlatseqatigiiffimmi LNS-Grønlandimi pisortaq, Gunnar Moe, nittartakkamut High North Newsimut taama oqarpoq.
Rubinisiorfiup Aappaluttup septembarip qaammataani akiliisinnaajunnaartup akuersissutaanik ingerlatseqatigiiffiup tunineqarnissaanut tunngatillugu Gunnar Moe isumalluarpoq.
- Sapaatit-akunneranni matumani ulluni qaninnerni, immaqa marlunngornermi, aalajangiiffigineqarnissaa naatsorsuutigaarput, Moe oqarpoq, nunatsinnilu oqartussat maannamut oqaloqatigineri "pitsaasutut angusaqarfiulluartutullu" taallugit.
Aamma atuaruk Qeqertarsuatsiaat eqqaani rubinisiorfik LNS Greenlandip ingerlatilertussanngorpaa
- Ukioq manna aallartissinnaaniassagutta suliap pilertortumik ingerlanneqarnissaa noqqaassutigalugu erseqqissaatigaarput, maannami ukiarsalerpoq, LNS-Grønlandimi pisortaq oqarpoq.
Ingerlatseqatigiiffiulli nalunartut pillugit rubinisiorfiup ukioq manna isertitaqannginnissaa missingersuutigaa, 2017-imili 250 aamma 300 millionit koruunik akornanni isertitaqarnissani neriuutigalugu.
Aamma tunisassiorneq 2017-imi aallartilluarpat 60 aamma 70-it akornanni sulisoqarnissani naatsorsuutigaa.
Aamma atuaruk Rubinisiorfik neriulluartitsigaluartoq
Aamma atuaruk Akiliisinnaajunnaartoq: Rubinisiorfik ammaqqeriaannaasoq
Aatsitassanut naalakkersuisoqarfimmi pisortaq Jørgen Hammeken-Holm naapertorlugu, naalakkersuisoqarfiup Naalakkersuisunut inassuteqaataat naammassineqarluni tallimanngormat tunniunneqarpoq.
Naalakkersuisoqarfiup inassuteqaataata imaraa True North Gems Greenlandip akuersissutai LNS Greenlandimut ilumut tunniunneqassanersut.
Akiliisinnaajunnaartup pigisaata pisiarinissaanut LNS Greenlandip neqeroorutaa akuersissutinik tunineqarnissamik aamma piumasaqaatitaqarpoq.