Kappoqqummik rubinitalimmik tuniniaallutik meeqqanut aningaasanik katersuiniartut
Gentofte Kommunemi - meeqqat, inersimasut, peqatigiiffiit suliffeqarfiillu - peqatigiillutik UNICEF aqqutigalugu Nunatsinni meeqqat nukittorsarnissaannut atorneqartussanik 2018 naallugu aningaasanik katersuiniassapput.
Kuultinik saffiortoq Nicolai Appel eqqumiitsuliortorlu nunatsinneersoq Buuti Pedersen katersuiniarnermi suliniutigineqartut ilaannut peqataapput.
Kappoqqummik sølviusumik immikkut ilusilersukkamik suliaqarsimapput - taanna rubininik nunatsinneersunik pinnersagaavoq kuultimullu ikkunneqarsimalluni. Kappoqqut ataaseq 2.500 koruuneqarpoq, UNICEF-illu 2018-imi Illoqarfianut UNICEF-illu Nunatsinni meeqqat pillugit suliniutaanut katillugit 3 millionit koruunit katersorniarneqarput.
AAMMA ATUARUK Gentoftep kalaallit meerartai katersuiniutilerai
- Kalaallit Nunaata pinngortitami pisuussutaata nunap meerartaanut iluaqutaasinnaanerat takutikkusuppara, Nicolai Appel suliniutini annertooq pillugu taama oqarpoq. Sølvimik kappuqqummik tunisamit ataatsimit 1.200 koruunit UNICEF-ip 2018-imi Illoqarfianut UNICEF-illu Nunatsinni meeqqat pillugit suliniutaanut toqqaannartumik tapiissutigineqassapput.
Naalagaaffiit Peqatigiit meeqqat pillugit suliniaqatigiiffiat UNICEF suliniut NAKUUSA aqqutigalugu nunatsinni suliaqarpoq. Gentoftellu UNICEF-ip 2018-imi Illoqarfiatut toqqarneqarneratigut, ilaatigullu meeqqat siunnersuisoqatigiivinik pilersitsisoqarneratigut, kiisalu Naalagaaffiit Peqatigiit Meeqqat pillugit isumaqatigiissutaata Tunumi ilinniartitsisunut ilinniartitsissutigineratigut pingaartumik meeqqat Tunumiittut tapersersorneqassapput.