Gentoftep kalaallit meerartai katersuiniutilerai
Tamanna Gentoftep ukiortaamiit UNICEF-ip illoqarfia 2018-itut taasinnaalernissaanut atatillugu pivoq.
Kommunip 2018-imi immikkut siunertaqarluni aningaasanik katersiniarnera saniatigullu meeqqat pisinnaatitaaffiinut tunngasumik suliaqarniarnera toqqaanerup kinguneraa.
Taamaalillunilu Gentoftemi katersuiniarnermut "Kalaallit meerartaat oqaaseqaqataasinnaatikkimik" qulequtaqarallartumik, kalaallit meerartaasa inuusuttaasalu atugaannik pisinnaatitaaffiinnillu pitsanngorsaaniarnermik suliniuteqarnissaq siunertassaqqissivoq.
Katersiniarnikkut ilaatigut Tunumi meeqqat siunnersuisoqatigiivinik, tunumiut meerartaasa inuusuttaasalu najukkaminni nunatsinnilu tamarmi inuinnaat naalakkersuisooqataaneranni oqaaseqaqataasinnaalernerannut pitsanngorsaasussamik pilersitsinissaq aqqutissiuunneqassaaq.
Tamatuma saniatigut Tunumi ilinniartitsisut Naalagaaffiit Peqatigiit Meeqqat Pillugit Isumaqatigiissutaat pillugu ilinniartinneqassapput, nunalu tamakkerlugu ikinnerussuteqartuni atuartitsinermik atortut ukkataralugit tunumi meeqqani inuusuttunilu inuiaqatigiinni nikinganerit annikillisarneqassasut, Gentoftep borgmesteria, Hans Toft oqarpoq, taassumalu kommunip tamarmi UNICEF By 2018-iunissaanut tamat suleqataanissaat qilanaaraa:
- Gentoftep Tasiilaq illoqarfittut ikinngutigereerpaa, maanilu meerarpassuit atuartut ilaqutariillu kalaallinut atuartunut angerlarsimaffimminnik ukiorpassuarni ammaassisarput, meerartavullu ukiut tamaasa aamma tikeraartarlutik, Hans Toft oqarpoq.
Gentofte UNICEF By 2018-iunera januaarimi pisortatigoortumik malunnartinneqassaaq.
