Royal Greenlandip pisiortornera Atassutikkormiut naammaginngilaat
Royal Greenlandip Qeqertami tunisassiorfiutini ukiut arlallit matuma siorna tunivaa, maannalu suliffeqarfiup tunisassiorfimmik piginneqataassutinik amerlanerussuteqarluni piginneqataaqqilerpoq. Tamanna sumiiffimmi aalisartunut akilutsitsisoqalerneranik kinguneqarsinnaanera Atassutip aarleqqutigaa.
- ATASSUT-ip tungaanit isumaqarpugut pisortat piginnittuunerisigut pisiortornerisigullu inuiaqatigiit kukkusumik ingerlalissasut, paarlattuanik isumaqarpugut pisortat piginneqataaffigisaat sutigut tamatigut annikillisarneqarlutillu ukiuni aggersuni namminersortunngorsarneqartariaqartut. Oqaluttuarisaanerummi sutigut tamatigut takutereerpaa namminersortunngorsaaneq najukkami atugarissaarnerulernermik sunniuteqarsimasut, aalisartut tunitsiveqarnikkut pitsaanerusunik periarfissaqalerlutik, suliffissuit suliffissaqartitsillutik, kommunimut nunattalu karsianut akileraarutitigut isertitat amerlillutik, inunnik isumaginninnermi aningaasartuutit apparlutik minnerunngitsumillu najukkami isumallualernermik pilersitsisarlutik, Atassutip siulittaasua Gerhard Petersen naqissusiivoq.
Atassut isumaqarpoq namminersunngortunngorsaasoqartariaqartoq killormut iliortoqarani, soorlu tamanna Qeqertami takuneqarsimasoq. Partii isumaqarpoq suliffeqarfiit imminut akilersinnaasut namminersortunillu pigineqartut aqqutigalugit Nunatsinni atugarissaarnissaq namminiilivinnissarlu taamaallaat qulakkeerneqarsinnaasoq.
-Royal Greenlandip ukiut arlallit matuma siorna nunaqarfinni tunisassiorfinnik tigusisimanera assersuutissaalluarpoq. Tunisassiorfiit pisortanit tapiiffigineqarani ajornartorsiutitaqanngitsumik ingerlanneqarsinnaanerat nalunaarutigineqarpoq. Kingornali paasinarsivoq RG-ip naatsorsuutigisaatut imminut akilersinnaanngitsut tunisassiorfiillu matuneqarlutik. Tunisassiorfiit pisortanit tapiiffigineqarpata aatsaat ammaqqinneqarnissaannik suliffeqarfik nalunaaruteqarpoq. Tamannalu pivoq naak namminersortut, nunaqqatigiinnut iluaqutaasussamik tunisassiorfiit ilaannik tiguserusukkaluartut, Gerhard Petersen isumaqarpoq.
