Royal Greenland nutaamik siulittaasortaartoq
Royal Greenlandip siulersuisuini tallimanngormat immikkut ittumik ataatsimeersuarnermi allannguisoqarpoq.
Niels Thomsen ukiuni kingullerni marlunni siulittaasup tulliatut atuuffeqareerluni maanna siulittaasunngorpoq. Tassalu Maliina Abelsen 2022-mili siulittaasuusoq siulittaasutut taarserpaa.
- Anguniarpara Royal Greenland suliffeqarfiussasoq pitsaasumik ingerlanneqartoq unammillersinnaas-suseqartorlu, peqatigitillugulu Kalaallit Nunaanni suliffeqarfinni anginersaanini pissutigalugu inuiaqatigiinnut akisussaaqataasussaanerminik naammassinnissinnaasoq.
- Maani nunatsinni niuernikkut sammisanut aningaasalersuinigut ukkatissavagut, nunarsuarmi inissisimanitsinnik nukittorsaanissaq Kalaallit Nunaannilu siuariartor-nermik periarfissanillu angusaqarnissaq siunertaralugu, Niels Thomsen tusagassiuutinut nalunaarummi oqarpoq.
Taanna maanna siulittaasuusimasumut Maliina Abelsenimut qujassuteqarpoq. Maliina Abelsenilu Niels Thomsenimit siulittaasutut taarserneqarnini toqqissisimanaralugu oqarpoq.
Maliina Abelsenillu siulittaasuunermin angusimasat tulluusimaarutigalugit oqaatigaa.
- Ataqqinaataasimavoq angusarissaarnerulernissaq anguniarlugu sulineq piumasaqaatitaqarfioqisoq siulersussallugu nunanilu allani ingerlatat ilaanni saleeqataassalluni, periusissiap INUA 2027-i atuutsilissallugu, Nuummi aqutsisoqarnikkut nukittorsaassalluni qullersaqarfimmillu nutaamik sa-naartornermik aallartitsissalluni, Maliina Abelsen tusagassiuutinut nalunaarummi oqarpoq.
Maliina Abelsenip naalakkersuisunut isumaqataanngikkaangami saqqummisumik oqaatigisarnikuuaa. Tamanna Naalakkersuisut Royal Greenlandip pisortaqatigiivisa nunatsinniinnissaannik piumasaqaataannut isumaqataannginnerminik oqariartuuteqarnerani takuneqarsinnaavoq.
Naalakkersuisut ataatsimeersuarnermut tunngatillugu aalajangiussaanni naalakkersuisunut ilaasortaq Naaja H. Nathanielsen isumaqataanngitsoq naalakkersuisut ataatsimiinneranni imaqarniliami atuarneqarsinnaavoq.
