Royal Greenland GIF-imut aningaasaliissuteqalersoq
Kalaallit Nunaanni timersoqatigiit kattuffiat Royal Greenlandilu ukiunut pingasunut tulliuttunut aningaasaliinissamik isumaqatigiissuteqarput.
Allattoq Kenneth Elkjær, Mads Pedersen
februaarip 16-at 2017 13:59
Kalaallit Nunaanni timersoqatigiit kattuffiata bankimi kontoa ukiuni pingasuni tulliuttuni 200.000 koruuninik ikisiffigineqartassaaq. Aningaasat taakku Royal Greenlandimeersuusassasut, suliffeqarfiup nittartakkamini nalunaarutigaa.
GIF-imi siulittaasup tulliata Finn Meinelip Royal Greenlandillu pisortaata Mikael Thinghuusip isumaqatigiissut pingasunngormat atsiorpaat.
GIF-ip kattuffiup ukiuni tulliuttuni pingasuni suliaqarnissaanut aningaasat tunngaviusussat qulakkeerneqarnerat nuannaarutigaa.
- Aningaasaliinissamik isumaqatigiissuteqarnerput iluarusunnaqaaq, pingaartumik isumaqatigiissut ukiuni pingasuni atuuttussaammat, eqqissilluni sulisoqarsinnaalerpoq siunissamullu pilersaarusiornissamut periarfissiilluni, Finn Meinel oqarpoq.
