Royal Arctic Line aningaasaqarnermi ‘nalinginnaasumik ikileriartoqaraluartoq’ millioninik sinneqartooruteqartoq
Royal Arctic Linep 2025-mut naatsorsuutiminik angusaqarnissi iluatsippaa.
Suliffeqarfik 15 millionit koruuninik siorna sinneqartooruteqarpoq.
Royal Arctic Line tusagassiuutinut nalunaarummi allappoq.
Ukiumut 15-it aamma 25 millionit koruunit missaannik sinneqartooruteqarnissaq aammali 2024-mi nassiussat amerlaqataannik nassiussinissaq naatsorsuutigineqarpoq.
- Tamanna naak nunatsinni aningaasarsiornerup ingerlanerani ikileriaateqartoqaraluartoq, pingaartumik sanaartornermut aalisarnermullu tunngatillugu nassiussat ikilinerat eqqarsaatigalugu anguneqarsinnaasimavoq, tusagassiuutinut nalunaarummi allassimavoq.
Kaaviiaartitat nassiunneqartut ikilernerannit qanoq sunnerneqarsimanersoq tusagassiuutinut nalunaarummi allassimanngilaq.
Taarsiullugulu Namminersorlutik Oqartussat suliffeqarfiutaata ingerlatsineq naleqqussarsimallugulu pisortanit tapiissutit avataanni naatsorsuutinut tapiissuteqaataasussanik nutaanik suliassarsiorsimallutik oqaatigaa.
RAL-imut ukiut ilungersuanartut
Naak 2020-mit 2024-mut kaaviiaartitat 979 millionit koruuninit 1,2 milliardit koruuninut aalaakkaasumik amerliartoraluartut naatsorsuutini angusat malinnaasimanngillat.
Royal Arctic Line akileraannginnermi 96 millionit koruuninik 2022-mi amigartooruteqarpoq, ukiunilu 2023-mi 2024-milu 5 millionit koruunit missaannik amigartooruteqarluni.
Suliffeqarfiup 2025-mi ukiup affaani siullermi 56 millionit koruuninik amigartooruteqarluni siorna aggustimi oqaatigaa.
Immikkut ittumik oktobarimi ataatsimeersuartoqarmat siulersuisunut siulittaasoq taarserneqarpoq, tassanilu Royal Arctic Linemut qanoq suliassaqartiginera aamma oqaatigineqarluni:
- Nunatta illoqarfiinut najukkanullu minnerusunut ajornanngitsumik patajaatsumillu assartuinissap qulakkeernissaanut suliassarujussuaqarputit, Jens-Frederik Nielsen siulittaasunngortumut, Inooraq Brandimut toqqaannartumik oqaaseqartoq, Sermitsiaq allappoq.
2026-mut isumalluartoqartorujussuaq
Sinneqartoorutit amerlanerusut suliffeqarfiup siunissaanut immikkut qulakkeerinneqataassasut, tusagassiuutinut nalunaarummi allassimavoq:
- Suliffeqarfissuup angusai naammaginartutut oqaatigineqarsinnaapput, kisiannili siunissami aningaasaliissutissat naammattut piginissaannut angorusutatut naatsorsuutigineqartunit amerlannginnerupput, nalunaarummi allassimavoq.
Suliffeqarfiup 15-it aamma 25 millionit koruunit akornanni 2026-mut sinneqartooruteqarnissani naatsorsuutigisani attatiinnarpaa.
Sinneqartoorutit taakku ‘umiarsuarnut nutaanut, tassunga pramminut pajuttaatinullu issittumut pissutsinut immikkut tulluarsakkanut’ aningaasaliinissamut tunngaviliissapput.
