RAL 2022-mut naatsorsuutini amigartooruteqangaatsiartoq
![](/sites/default/files/styles/image_934x467/public/article_images/img_7050_0.jpg?itok=in9shfPZ)
Royal Arctic Linep Danmarkimi siorna ukiup affaani kingullermi marloqiusamik ingerlatsinini pissutigalugu 56-it aamma 66 millionit koruunit akornanni aningaasatigut amigartooruteqarnissaa naatsorsuutaavoq.
Aarhusilli umiarsualivianut nuunnissaq nuunnerup naggataani pilersuineq qulakkeerniarlugu decembarip 31-anit juunip qiteqqunneranut nikisinneqarnera pissutigalugu Aalborgimi Aarhusimilu umiarsualivinni ingerlatsineq 2022-mi ukiup affaani kingullermi 30-t aamma 35-t millionit koruunit missaannik saniatigut aningaasartuuteqartitsivoq.
Royal Arctic Linep ataasinngornermi ataatsimeersuarnissaa sioqqullugu suliffeqarfik ukiumoortumik nalunaarusiamik saqqummersinnermut atatillugu tusagassiuutinut nalunaarummi paasissutissiivoq.
Ataasiaannartumik amigartooruteqarnerusoq
Royal Arctic Linep pisortaanerata Verner Hammekenip angusat nunatsinnut 1972-imili imaatigut assarsuisarnermi annerpaami pilersuinerup allannguiffigineqarnerani illersorneqartussaaneranut atatillugu isiginiarneqassapput.
Tamatuma saniatigut allannguineq naammassisimavoq ulluinnarnilu ingerlatsineq nanginneqaqqissinnaasoq erseqqissaatigaa:
- Inuiaat kalaallit piginnittorivagut innuttaasullu sullitaralugit. Innuttaasunut aningaasartuutaasoq inuiaqatigiinnut tamanut pingaaruteqartupilussuuvoq. Taamaammat aamma akinik qaffaanani allanngortiterinerup ingerlanneqarnissaa pingaartissimavarput, Verner Hammeken tusagassiuutinut nalunaarummi oqarpoq.
Taamaammallu RAL-ip Aalborg Havnimit Aarhus Havnimut nuunneq nammineq aningaasalersorsimagaa paasissutissiissutigaa.
Royal Arctic Line umiarsualiviup Aalborgimi suliaqarunnaarneranut atatillugu sulisut 87-it soraarsinneqarnerisa kingorna ilinniartut 33-t ilanngullugit 731-nik sulisoqarpoq.
Suliffeqarfik nunatsinnut assartuinermut kisermaassisussaatitaasuuvoq, tamannalulu pissutigalugu nioqqutissanik nunatsinnit nunatsinnullu assartuinermut akiutinneqartut naalakkersuinikkut aalajangerneqartarlutik.