Royal Arctic Line allannguisoq – 2026-mut naatsorsuutit 10 millionit koruuninik amerligaat
'Kalaallit Nunaanni aningaasarsiorneq ataatsimut isigalugu kinguariartorpoq.
Umiarsuaatileqatigiiffiup Royal Arctic Linep 2025-mut naatsorsuutit maajimi saqqummiummagit taama nalunaaruteqarpoq.
Namminersorlutilli Oqartussat suliffeqarfiutaata 2026-mut naatsorsuuteqarnerulersimanertik maanna nalunaarutigaa.
- Royal Arctic Linep 2026-mi qaammatini arfinilinni siullerni assartugai amerleriarput taamaalillunilu kaaviiaartitai aamma amerlipput, ingerlatseqatigiiffik tusagassiuutinut nalunaarummi allappoq.
Tamanna Royal Arctic Linep 2026-mi 25 aamma 35 millionit koruunit akornanni, naatsorsuutigineqaqqaartumit 10 millionit koruuninik amerlanerusunik kaaviaartitaqarnissaannik naatsorsuuteqalersitsivoq.
- Ukioq manna qaammatini arfinilinni siullerni ineriartorneq naammagisimaarparput, aningaasaqarnermut pisortaq Jørgen Aqe Møller tusagassiuutinut nalunaarummi oqarpoq.
Assartukkat amerlisut
Royal Arctic Linep nalunaarutaa naapertorlugu, 2026-mi assartukkat qaammatini arfinilinni siullerni, 2025-mi qaammatini arfinilinni siullerni assartukkat amerlassusaannut sanilliullugit 2,7 procentimik amerlanerupput.
Aammattaaq ilaasut, siorna ilaasut amerlassusaannut sanilliullugit, 29 procentinik amerleriarsimanerat Arctic Umiaq Linemut siuariaataavoq.
- Assartukkat amerliallapput missingersuusioqqaarnitsinniillu angusaqarluarnerunissarput naatsorsuutigaarput, Jørgen Aqe Møller oqarpoq:
- Tamanna isumaqarpoq ingerlatseqatigiiffiup umiarsuaataasa nutarterneqarnissaannut aningaasaliinissamut uninngasuutissanik pisariaqartunik katersueqqissinnaaleriartussasugut.
Arctic Umiaq Linep pisortaanerata Sarfaq Ittup ukiuni 34-ni atorsimasup taarserneqartariaqarnera siorna aggustimi oqaatigaa.
Royal Arctic Linelu 2025-mut naatsorsuutini allappoq, sinneqartoorutit 'umiarsuaatinut aningaasaliinernut, ilaatigut pramminut nutaanut umiarsuarnillu assartuutinik issittumi atugassatut immikkut sanaanut, aningaasaliiffiginninnissamut tunngaviujumaartut'.
Aningaasartuutit amerlisut
Royal Arctic Linep tusagassiuutinut nalunaarummi nutaami allappoq, 'naak aningaasartuutit amerligaluartut', angusaqarluarnerunissaq naatsorsuutigineqartoq.
Ingerlatseqatigiiffiup aningaasartuuteqarnerulernermut suna pissutaanersoq tusagassiuutinut nalunaarummini oqaatiginngilaa.
Naatsorsuutit 2020-miit 2024-moortut qimerlooraanni, kaaviiaartitat 979 millionit koruuninit 1,2 milliardit koruuninut aalaakkaasumik amerliartorsimapput, angusalli tamatigut taama amerlatiginngillat.
Royal Arctic Line akileraarutit suli ilanngaannagit 96 millionit koruuninik 2022-mi amigartooruteqarpoq, 2023-mi aamma 2024-mi 5 millionit koruunit missaannik sinneqartoorpoq.
Akileraarutit suli ilanngaannagit 15 millionit koruuninik siorna angusaqarpoq.
