Ria Hansenip uini Nuuk Imermi naapippaa: Inuunerivara angerlarsimaffimma aapparaa

- Takorlooruminaatsippara, aamma ulloq taanna Nuuk Imermiikkunnaarutta sumukassanerluta naluara.

43-nik ukiulik, John Hansen taama oqarpoq. Taanna Nuuk Imermi ukiuni 21-ni sulivoq, taassumalu suliffeqarfiup aappaagu matunissaa suli paasiuminaatsippaa.

Nunatsinni sodavandinik immiaaqqanillu maqiterivituaq ukiut 40-ngajaat maqiterivioreerluni 2024-mi januaarip aallaqqaataani matusussanngortoq tallimanngornermi nalunaarutigineqarpoq.

Siulersuisut oqarnerat naapertorlugu puiaasanut inatsip nutaap ukiortaap kingorna atuutilernerata kinguneranik matusariaqarput. Inatsit nutaaq pissutigalugu unammillertussaqalissaaq.

Tamannalu aappariinnut John aamma Ria Hansenimut annertuumik eqquivoq. Taakku Nuuk Imermi ukiorpassuarni sulisimapput.

- Nuuk Imeq uannut isumalerujussuuvoq inuusuttuaraallungali Nuuk Imermi sulilernikuugama, taamaammat uannut isumalerujussuuvoq, Ria Hansen oqarpoq. Taanna Nuuk Imermi ukiut 17-it matuma siorna sulilerpoq.

Naalli Nuuk Imeq ukiup nutaap tungaanut suli maqiterisussaagaluartoq Ria aamma John Hansen sulisut allat 50-it assigalugit tamatuma kingorna nutaamik suliffissarsiortariaqarput.

Meeqqat peroriartorfigigaat

Aappariit Nuuk Imermi ukiorpassuit matuma siorna naapipput.

Ria Hansen immikkoortiterisutut aallarteqqaarpoq, ingerlalluaramili maskinanik suliaqartunngortinneqarput.

- Una aappara maskiinat ilaanniittoq takoqqaarpara taamanili naapippugut aappariilerlutalu, taanna oqarpoq.

Aappariit marlunnik qitornaqarput, taakkulu maqiterinermik suliffeqarnermi saniatigut ikinngutaat aamma tassaniipput.

- Aapparalu taakani naapippugut aammalu meeqqagut taakani peroriartorput uaguinnaanngilaq allat aamma taamak inuupput, kammalaatigiiarpugut nalunngisareerralluta, Ria Hansen oqarpoq.

John Hansen immikkoortiterisutut eqqiaasutullu sulileqqaarpoq. Kingornalu maqiterivimmut nuutsinneqarluni, ingerlalluarneralu pissutigalugu nioqqutissiornermi aqutsisunngorpoq.

Akiuulluarnikuusut

Nuuk Imermi pisortap, Bernhard Christensenip suliffeqarfik matunissaminut aarlerinartorsiortoq januaarimili siumut ilimagereerpaa.

Ria aamma John Hansenip oqarnerat naapertorlugu ukiut ingerlanerani matoratarsinnaaneranik oqaluttoqartarnera aamma tusartarsimavaat.

- Nalunngikkaluarparput Nuuk Imerup matunissaa eqqartorneqartartoq kisianni kinguartinneqartuaannarpoq, tamatumuuna matusussanngornera tupannarpoq. Annernarpoq alianarpoq soorunami, Ria Hansen oqarpoq.

- Ukiorpassuit akiuulluarnikuuvugut ingerlaannartarlunilu, taamaammat tupannarpoq, John Hansen oqarpoq.

Aappariit Nuuk Imeq matuppat sumunnassanerlutik maanna eqqarsaatigisussanngorpaat. Taakkuli inuusuttuullutilli Nuuk Imermi sulilernikuugamik allami sulilernissaq takorlooruminaatsippaat.

- Ukiorpassut taamatut ingerlanikuugatta massakkut piviusunngornera isertikkuminaappoq suli, aamma suli pilersaarusiornikuunngilagut sumut ingerlariassanerluta, ukiorpassuimmi susoqarani ingerlavoq massakkullu susoqariasaarmat tupannarlunilu nalunarpoq, John Hansen oqarpoq.

Nuuk Imermi siulersuisut sulisut 40-nit amerlanerusut soraarnissaannut piareersaallutik sapinngisaminnik iliuuseqarsimallutik tusagassiuutinut nalunaarummi allappaat.