Kukkunersiuisup atornerluineq annerusinnaasorigaa

Doris J. Jensenip atuuffimminut atatillugu biiliminut benzinasiniutissaminut akiliutaanit angallatimut orsiinernut ikinnerpaamik 6.855 koruunit atornerlunneqarput.

Akiliulli atornerlunneqarnerusimasinnaasoq kukkunersiuisoq Bo Colbe misissuinermut allaatigisamini, KNR-ip pissarsiarisaani, inerniliivoq.

AAMMA ATUARUK Kortit benzinasiutissat killiligaanngillat

Orsulersuisarfimmi taamaallaat umiatsianit atorneqarsinaasumi orsiisoqartarsimammat, 6.855 koruunit Doris J. Jensenip illoqatiginngisaanit angallammik orsiinermut atorneqarsimanerat qularnanngitsoq, kukkunersiuisoq allappoq. Taamaaliortorlu nassuersimavoq, aningaasallu taarsereerlugit.

Biilinulli orsiisarfinni orsiinerit kukkunersiuisup aamma maluginiarpai.

Misissuinermi allaatigisaq naapertorlugu, Doris J. Jensenip atuuffimmini biilia benzinamik 60 literimik taamaallaat imaqarsinnaagaluartoq orsiisarfinnit 75 literimik arlaleriarluni maqiterisoqartarsimasoq pisianut allagartat takutippaat.

AAMMA ATUARUK Savalimmiunisulli ammasuunissamut inatsiseqartariaqarpugut

Aamma 25 literinit minnerusumik maqiterisoqartarsimavoq, tamannalu kukkunersiuisup ima oqaaseqarfigaa.

- Dunkit angallatinik orsiinermut atorneqarsinnaasut benzinamik 20 taamatullu 25 literinik imaqarsinnaasut pissarsiarineqarsinnaapput, kukkunersiuisoq allappoq.

Taassuma benzinasiniutissap ukiup ilaani angalaffiunerusumi atorneqakulanerusarsimanera aamma maluginiarpaa. Akiliut 19-eriarluni aggustimi atorneqarpoq, tassalu agguaqatigiissillugu ulloq allornaguluunniit akunneqartarluni.

AAMMA ATUARUK Deloittep benziinasissutissaq pillugu misissuinera aana

- Taamaattumik qulaani taaneqartut aallaavigalugit assortorneqarsinnaanngilaq, dunkinik assingusumilluunniit immiisoqartarsimanera - taakkua kisimiitillugit imaluunniit suliffimmut atatillugu biilip orserneqarneranut atasumik ingerlanneqartarlutik, kukkunersiuisoq allappoq.

Taannali ilanngullugu allappoq, tamanna eqqoqqissaarnersoq pisianut allagartat aallaavigalugit oqaatigineqarsinnaanngitsoq.

- Taamaattumik taassuma politiinit annermik misissuiffigineqarnissaa pisariaqarpoq, kukkunersiuisoq allappoq.

AAMMA ATUARUK Dorisip benzinamut kortia tigoriaannaasimasoq kukkunersiuisup isornartorsioraa

Ilinniartitaanermut, kultureqarnermut, ilisimatusarnermut ilageeqarnermullu taamani naalakkersuisoqarfiup Doris J. Jensenip benzinasiniutissaanik atornerluineq politiinut nalunaarutigaa, politiilli unnerluutigineqartoq pineqaatississutaasinnaasumik ilumut iliuuseqarsimanersoq uppernarsarsinnaasorinnginnamikku pasilliut unitsereerpaat.

Kukkunersiuisup misissuinermini aamma maluginiarpaa, benzinamut akiliut atorlugu 2017 tamaat orsiisoqartorujussuusarsimasoq. Piffissami tassani orsiinerit katillugit 91-iupput. Taakkuni atornerluinerit qassiunersut ilisimaneqanngilaq.