Kukkunersiuisut nalunaarusiaat: Kortit benzinasiutissat killiligaanngillat

Kortit benzinasiutissatut Naalakkersuisunut tunniunneqartut killiligaanngillat. Kukkunersiuisut Deloittemeersut nalunaarusiaminni taama allapput.
Allattoq Kenneth Elkjær
oktobarip 16-at 2018 09:41
Nutserisoq Simon Uldum

Korti benzinasiutissaq naalakkersuisumut Doris J. Jensenimut tunniunneqartoq 2017-imi akulikitsumik atorneqartarsimavoq. Kortip atornerlunneqarsimaneranut atatillugu kortip benzinasiutissap atorneqarneranik Deloittep misissuinerata tamanna ersersippaa. 

Akiliutissaq 2017-imi januaarip aallaqqaataanit septembarip 30-anut 91-eriarlugu atorneqarpoq. Misissuinermik naalakkersuisup Doris J. Jensenip 2017-imi ukiakkut suliakkiissutigisaanik ingerlatsisoq, kukkunersiuisoq naalagaaffimmit akuerisaq Bo Colbe naapertorlugu, korti qaammammut agguaqatigiissillugu quleriarlugu atorneqartarsimavoq. Naalakkersuisup kortip benzinasiutissap angallatip orsernissaanut atorneqarsimanera paasigamiuk misissuisoqarnissaanik suliakkiissuteqarpoq.

Doris J. Jensenip kortiata benzinasiutissap atornerlunneqarneranut atatillugu orsiinernit 91-iusunit qassit atornerluinermut attuumassuteqarnersut Deloittep misissuinerani ersersinneqanngilaq, kukkunersiusulli misissuinermini naqissuserpaa atornerluinermi ikinnerpaamik 6.855 koruunit pineqartut.

AAMMA ATUARUK Demokraatit benzinasiniutissamut suliamut nalunaarusiaq utaqqimaarniaraat

Kukkunersiuisup Bo Colbep misissuinermini oqaatigaa korti ukiup ingerlanerani nalinginnaasumik atorneqarluartarsimasoq:

- 'Nalinginnaasumik atuineq' nassuiassallugu ajornakusoorpoq, atuinerulli takutippaa kilometerinik amerlasuupilussuarnik biilertoqarsimasoq, kukkunersuisoq Deloittemeersoq Bo Colbe taama allappoq.

Kortilli benzinasiutissatut Naalakkersuisuni ilaasortanut tunniunneqartut killiligaanngillat.

- Kortip atorneqarnissaanut aalajangersaalluni killersuisoqarsimaneranik eqqaasaqartoqanngilaq, taamaattumillu orsiinermut kortip atorneqarnerata immini malittarisassanik atuuttunik unioqqutitsinertut oqaatigineqarsinnaanani.

Taamaammat 'orsiinermut kortit atornissaannut killiliussanik sukumiinerusunik' aalajangersaasoqarnissaa kukkunersiusup kaammattuutigaa. Killilersuisoqarsimanngikkaluartorlu Bo Colbe ima erseqqissaavoq:

- Malittarissanik tigussaasunik peqanngikkaluartoq, orsiinermut kortip siunertamut tamatumunngaannaq atoqqusaanera (biilip orsernissaanut, aaqq.) naatsorsuutigineqartariaqarpoq.

AAMMA ATUARUK Kortimik benzinasiniutissamik atornerluisoqarsimanera Kielsenip oqaaseqarfigerusunngikkallaraa

Kultureqarnermut, Ilageeqanermut Ilinniartitaanermullu naalakkersuisoqarfik inummik kortimik atornerluisimasutut 2017-imi ukiakkut nalunaarutiginnippoq. Pineqartup 6.855 koruunit utertippai, politiilli pineqartumut pasilliutaat kingorna taamaatiinnarneqarpoq.

AAMMA ATUARUK Korti benzinasiniutissaq angallatip orsersorneqarnissaanut atorneqarpoq