Kinamiut takornariat ajornannginnerusumik tikittalernissaat nuannaarutigineqartoq
Kinamit takornariartartut amerlasoorujussuusarput pisisinnaassusiallu annertulluni, Malik Milfeldt
takornariartitsivimmi Albatros Arctic Circlemeersoq Malik Milfeldt oqarpoq.
Danskit nunanut allamiunut aqutsisoqarfiat aamma danskit Beijingimi aallartitaqarfiat, Kinamiunut Kalaallit Nunaannut takornariarniartunut immikkut ittumik sukkannerumik visumimik qinnuteqarsinnaanerannut aaqqiissuteqarput, tamannalu nunatsinni takornarialerisunit nuannaarutigineqarpoq.
- Oqarsinnaagunarpunga pilluarluta imaluunniit nuannaarutigisorujussuuarput tamannami ukiorpassuarni neriuutigisimagatsigu, Malik Milfeldt Albatros Arctic Circlemi ineriartortitsinermik pisortaq taama oqarpoq.
AAMMA ATUARUK Takornariat Kinameersut nunatsinnut ajornannginnerusumik tikissinnaalissasut
Takornariartitseqatigiiffiup takornariarpassuit ukiut tamaasa Kalaallit Nunaannukartittarpai, Ilulissani Kangerlussuarmilu unnuisarfiuteqarluni
Malik Milfeldtip oqaluttuaraa, Kinamiut takornariat mannaakkut kalaallit nunaannukartinniarneqartarnerat allaffissornarsimasoq.
Akimmiffissarpassuaqarsimavoq.
Kinamiut Danmarkimukartinneqartarnerat ajornanngitsuaraasimavoq, kisiannili Kalaallit Nunaannut ingerlaqqissagaangamik Schengenimi suleqatigiinneq pissutigalugu immikkut ittumik visumeqartariaqartarsimapput.
AAMMA ATUARUK Angalatitsisartut mittarfinnut pilersaarut utaqqisimagaat
Malik Milfeldt oqaluttuarpoq, Kinamiut takornariartartut amerlanerusuut pileritsatsinneqarnissaat ilippanaateqartorujussuusoq, Kinamimi akunnattunik isertitallit milliuuninit arlalinnik amerlatigisut angalanissaminnut akissaqarmata.
Taamaaliortoqassapallu Kalaallit Nunaanni takornariartitsisartut naleqqussartariaqassapput.
- Kinamiut allaanerusunik ullaakkorsiutitortarput tassalu nudler ullaakkorsiutigerusuttarpaat,
taavalu kalaallit nunaannut takornariartartunit sanilliukkaanni ukiup ilaani piffissani allatigut angalasarlutik, Malik Milfeldt taama oqarpoq.
AAMMA ATUARUK Siunissami takorniarialerisarnissaq sukumiisumik piareersarneqarli