Takornariat Kinameersut nunatsinnut ajornannginnerusumik tikissinnaalissasut
Nunanit allanit nunasiniartunut allaffeqarfiup Danmarkillu Beijingimi aallartitaqarfiata visumimik qinnuteqarniarnermi periaaseq sukkanerusoq maanna atuutilersissimavaa, takornariat Kinameersut Kalaallit Nunaannut ajornannginnerusumik takornariarsinnaanissaat periarfissaalissalluni.
AAMMA ATUARUK Angalatitsisartut mittarfinnut pilersaarut utaqqisimagaat
Kinamit Danmarkiliarniarnermi, matumanilu Kalaallit Nunaannukarniarnermi, visumimik qinnuteqarnermi sullissineq ullumi sapaatip-akunneri marluk-pingasut ingerlasarpoq, maannakkulli ullunik pingasuinnarnik tamanna pisalerluni.
Taava apeqqutinik nassiunneqassaatit. ADS Ordningimut ilanngunneqarsinnaanerluni taava sapaatip-akunnialunnguit ingerlanerani paasineqarsinnaassaaq. Visit Greenland taama allaaserisaqarpoq.
Visumimik qinnuteqartut sukkanerusumik sullinneqartalernerannut nunatsinni takornarialerisuullunilu, taava aaqqissuussamut ADS Ordningimut ilaanissaq piumasaqaataavoq.
Takornarialerisut, akunnittarfiit takornarialerisullu allat, Nunanit allanit nunasiniartunut allaffeqarfik aqqutigalugu aaqqissuussinermut taassumunnga peqataanissamut maanna qinnuteqarsinnaanngorput.
Kalaallit Nunaanni takornarialerisutut akuersissuteqaraanni, Kinami angalatitseqatigiiffinnik akuerineqarsimasunik suleqateqartoqalersinnaavoq, visumimik qinnuteqartut sukkanerusumik sullissinnaalissavaat. Visit Greenland tusagassiutinut taama allaaserisaqarpoq.
AAMMA ATUARUK Siunissami takorniarialerisarnissaq sukumiisumik piareersarneqarli
Takornariallu Kinameersut amerliartuinnalereerput.
Takornariat Kinameersut Nunatsinnikuartut 2015-imit 2017-imut 50 procentinik amerlisimasut kisitsisit Kalaallit Nunaanni Naatsorsueqqissaartarfimmeersut takutippaat, takornariat Kinameersut 2017-imi 1251-iullutik.
