Red Barnet Eksperimentimut peqataasimaneq utoqqatsissutigaat

Kalaallit meerartaasa ilaat 22-t "Eksperimentet"-imik taallugu ilaquttaminnit peersinneqarlutik 1951-imi Danmarkimiliartinneqartut sinneri maanna utoqqatserfiginiarneqalerput.
Asseq filmimiit "Eksperimentet" 2010-meersumit tigusaavoq Assi © : Foto fra filmen Eksperimentet
Allattoq Helle Nørrelund Sørensen
oktobarip 19-at 2015 10:09
Nutserisoq Mads Lynge

Suliniaqatigiiffimmi Red Barnetimi Københavnimi matoqqasumik sisamanngorpat ataatsimiittoqarnerani tamanna pissaaq.

Helene Thiesen, meeqqanut 22-nut taamanikkut 1951-imi ilaasoq, ataatsimiittoqarnissaanillu aaqqissueqataasoq, taama oqarpoq.

- Pisortatigoortumik utoqqatserfigineqarnissaq pingaaruteqaqaaq. Taamanikkut iliuuserineqartut ajorluinnarput, naapertuilluarnerullu aqqani maanna iliuuseqartoqarniarnera pitsaassaqaaq, Helene Thiesen KNR-imut oqarpoq.

Aamma atuaruk Carla Lucia Knakkergaard toquvoq

Red Barnet ilaqutarsiassaqartitsineq isumagisaraa

Kalaallit taamanikkut Danmarkiliartut ilaqutarsiassaqartinneqarnissaat Red Barnetip taamanikkut isumagisaraa, perorsaavinnillu nutaanik marlunnik Nuummi aamma pilersitsilluni. Meeqqat Danmarkimeereernermi kingorna perorsaavinni taakkunani taamanikkut inissinneqarput, ilaquttaminnut angerlartinneqaratik.

Meeqqat "Eksperimentet"-imi peqataatinneqartut 22-t akornanni taamaallaat pingasut Københavnimi ataatsimiinnissamut periarfissaqarsinnaasimapput, tassa ilaquttatik ilagalugit najuutinngikkunik Skypekkut peqataasinnaallutik.

Aamma atuaruk Meeraallutik misileraatitut atorneqartut BBC-p aallakaatitassialerai

Utoqqatserneq tamanut ammassaaq

Red Barnetip qullersarigallaanit Jonas Keiding Lindholmimit, Red Barnet Danmarkillu siulittaasuanit Lars Svenning Andersenimit, toqqaannartumik tassani utoqqatserfigineqarumaarput.

Red Barnetip "Eksperimentet"-imut peqataanera, 2010-mi taamanikkut qullersap Mimi Jakobsenip Danmarkimi Radioaviisikkut utoqqatsissutigaa. Meeqqalli utoqqatsertoqarsimaneranik ilisimatitsiffigineqanngillat, taamaammat nutaamik toqqaannartumillu utoqqatsertoqarnissaa maanna siunniunneqarpoq.

Red Barnetip, suliaq pillugu nalunaarummik nittartakkamini saqqummiussaqarnissaa pilersaarutaasoq, suliniaqatigiiffiup ilisimatitsissutigaa.

Aamma atuaruk Tine Bryld danskini arnani malunnaateqarnerpaasimasutut toqqagaasoq

Danskit Røde Korsiat 2010-mi peqataasimanerminut aamma utoqqatsersimapput, "meeqqallu" ilaasimasut naapissimanngilaat Red Barnet paasititsivoq.

Danskit naalagaaffiat pisortatigoortumik utoqqatserneqanngilaq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk