Meeraallutik misileraatitut atorneqartut BBC-p aallakaatitassialerai
Tv-kkut radiokkullu aallakaatitassaq "Witness" Tuluit tv-qarfissuata BBC-p maanna aallakaatinnialerpaa, pinngitsaalisaassummik nuutsitsisoqarnerata kingunerisai aallakaatitassiami eqqartorneqassallutik.
Helene Thiesen aallakaatitassiami pingaarnertut inuttaassaaq, meeqqat Danmarkimut pinngitsaalisaassummik nuutsinneqartut ilaattut peqataassalluni. Taanna Danmarkiliartinneqarnermini misigisimasani atuakkiarinikuuaai, atuakkiaalu ateqarpoq "For flid og God Opførelse".
AAMMA ATUARUK Eksperiment-børn kræver undskyldning før forsoning
Danskisut danskillu kulturiannik ilinniarnissartik pillugu meeqqat 22-t ilaqutarsiartaartinneqarput, qaammatinilu 18-ini Danmarkimiinnissaat pilersaarutaalluni. Taakkunannga 16-it Nunatsinnut utertinneqarput. Sinneri Danmarkimi meeravissiartaarineqarput, sinnerilu ilaatigut Nuummi meeqqat angerlarsimaffianni inissinneqarlutik.
Aallakaatitassiaq "Witness" BBC-mi pingasunngorpat juunip qulinganni aallakaatinneqassaaq. Tassa BBC World Service-imi nalunaaqutaq ullaakkut arfineq-pingasunut tanneq qulinut, Nunatta nalunaaqutaa malillugu ullaassakkut nalunaaqutaq tallimanut tanneq qulinut, 04:50, aallakaatinneqassalluni.
Aallakaatitassiaq BBC Worldip nittartagaani isiginnaarneqarlunilu aamma tusarnaarneqarsinnaassaaq.
