Tine Bryld danskini arnani malunnaateqarnerpaasimasutut toqqagaasoq

DR-p atuisartuisa atuakkiortoq Tine Bryld ilaatigut ilisimaneqartoq "Ajunngitsussaq pillugu"-mik atuakkiortutut, ukiuni untritilinni danskini arnaq malunnaateqarnerpaasimasutut qinigaavoq.

Allattoq Sandra Meinecke

juunip 06-at 2015 12:50

Arnat qinersisinnaalerneranniit ukiut hundredit qaangiunnerannut atasumik inunnik isumaginninnermi siunnersorti atuakkiortorlu Tine Bryld, ukiuni untritilinni danskit arnartaanni pingaaruteqarnerpaatut toqqarneqarpoq.

Tine Bryld ilaatigut ilisimaneqarpoq "Ajunngitsussaq pillugu"-mik atuakkiortutut, kalaallit meerartaasa 22-t ilaquttaminniit pinngitsaalisaallutik 1950-ikkunni Danmarkimut nuutsinneqarsimasut pillugit atuakkiaminik.

Meeqqat pinngitsaalillugit peersinneqarsimasut saniatigut, Tine Bryld aamma kalaallit Herstedvesterimi parnaarussaasimasut atugaasa pitsanngorsarneqarnissaat sorsuutigisimavaa.

Ukiuni untritilinni danskini arnaq malunnaateqarnerpaasimasoq Danmarks Radio'p toqqaasitsineratigut qinigaavoq.

Aamma atuaruk Utoqqatserfigineqarnissarput kissaatigaara

DR.dk'p atuartartui danskini arnaq, arnat hundredet akornanni, ukiut hundredet akornanni pingaaruteqarnerpaasimasoq toqqarpaat.

Tamatuma kingorna toqqarneqarnerpaasimasut qulit ingerlaqqipput. Tine Bryld ajugaasuuvoq, 10.000-inik sinneqartunit toqqarneqarsimagami. Tulleralugu Helle Thorning-Scmidt, Dronning Margrethe pingajuattut inissittoq.