Rasmus Lyberth BBC-p aallakaatitassiaraa

Erinarsortartorsuaq, Rasmus Lyberth, Tuluit Nunaata radioani, BBC-mi, aallakaatitassiami pingaarnertut inuttaalluni unnugu tusarnaarneqarsinnaavoq.
januaarip 27-at 2011 06:39

Ukiuni arlaqalersuni Rasmus Lyberthip nunarsuatsinni tusaamaneqarnerulernissaanik suliniut tassa maanna iluatsittutut oqaatigineqarsinnaalerpoq, aviisi Fyns Amts Avis taama allappoq.

Rasmus Lyberthip radiokkut aallakaatitassiarineqarnissaa isumassarsiarineqarpoq, BBC Københavnimi Kalaallit Nunaat pillugu, siorna ukiakkut aallakaatitassiormat. BBC-p aallakaatitsinermut aaqqissuisuisa, Rasmus Lyberth Womex festivaleqarnerani tusarnaartitsimmat tiguartingaarsimaganerup pianik aalajangerput taanna immikkut aallakaatitassiariniarlugu.

BBC-p sapaatip akunnera una tamaat aallakaatittassavai, nunani issittuni nipilersortartut, aallakaatitsisoralugit Andy Kershaw aamma Lucy Duran.

Rasmus Lyberth BBC-mit oqaatigineqarpoq Kalaallit Nunaata erinarsortartorsuarigaa nipimik sakkortuumik pilik. Rasmus Lyberth pillugu aallakaatitsisoqareerpat, tulliullugu aallakaatinneqassapput, Same erinarsortartoq, May-Torril, Nunavummi erinarsortartoq, Tanya Tagaq aammalu Siberiamiit Yakutsk.