IKIORTARIALLIT Nalunaarusiaq: Kinguaassiutitigut atornerlugaareersimanertik erloqissutigisaraat
Taamaaliortariaqartarnerat danskit aaqqissuussaanerannut paasinninnginnermik, kiisalu meeraanerminni kanngutsaatsuliorfigineqarsimanerannut atangajuppoq.
"Kialaarfigisinnaasannut iserumallunga timera atortariaqartarsimavara."
Kalaallit arnat Danmarkimiittut inooqataaniarnikkut ajornartorsiortut pillugit nalunaarusiami peqataasut ilaat taama oqarpoq.
Inuuniarnikkut ajornartorsiutaareersut saniatigut nalunaarusiap uparuarpaa arnat arlallit unnuiffissaqarumallutik atoqateqartartut, Danmarkimi Inooqataaniarnikkut ajornartorsiortunut siunnersuisoqatigiinni siunnersorti Helene Forberg oqaluttuarpoq.
- Angerlarsimaffeqanngitsunut unnuisarfinnukartarput, ikinngutiminniluunniit nalaasaarfinni unnuillutik, kingullertulluunniit angutini assigiinngitsuni siniffissarsiortartut, Helene Forsberg oqarpoq.
Aamma atuaruk Kalaallit arnat Danmarkimiittut ajornartorsiutaat ataatsimiissutigileraat
Danmarkimi illoqarfissuarni arlalinni inissaaleqineq assut ajornartorsiutaavoq, ingammik inunnut ikiorsiissutinik pisartunut. Ilutigitillugu suliffissaaleqineq, imigassamik ajornartorsiuteqarneq danskillu aaqqissuussinerata paasiuminaatsitap pissutsit arnanut ajornerulersittarpaat.
Tamakku qaavisigut kalaallit arnat arlallit kinguaassiutitigut kanngutsaatsuliorfigineqarsimasut kingunerlutsitsinermikkut katsorsarneqarsimanngillat.
- Aamma arnanut ajornartorsiutaavoq amerlasuut inuunerup ilaani kinguaassiutitigut atornerlugaaneq misigisimagamikku. Kinguneranik angerlarsimaffeqanngitsunut unnuisarfinniissinnaaneq-ajorput, tamakkumi arnanut angutinullu ammasuummata, Helene Forsberg oqarpoq.
Aamma atuaruk Danmarkimi kalaallinik arnanik atortittartoqarpoq
Nalunaarusiami arnat atoqateqarnissaq nuannarinngikkaluarlugu unnuiffissaqarusuttartut aamma ingerlaqqikkusuttarput, amerlasuullu atoqateqartariaqarneq akiliutitut isigisanngilaat.
- Arnat iliuutsitik oqaluttuarigaangamikkit oqartarput killiffiit ilaanni taamaaliornissatik pisariaqartarsimasut, imaluunniit taamaalinerani iliuusissamittut ajunnginnerpaatut toqqartariaqakkamittut qinertarlugu, Helene Forsberg oqarpoq.
Aamma atuaruk Danmarkimi kalaallinut ajornartorsiortunut kommunit ikiuutissaat assigiinngeqisut
Danmarkimi isumaginninnermik suliallit 16-it kalaallinik arnanik 22-nik apersuisimanerannik nalunaarusiaq tunngaveqarpoq.
Nalunaarusiaq pillugu Christiansborgimi ullumi ataasinngornermi ataatsimiinnermi oqallisigineqassaaq, tassanilu isumaginninnermut ministeri aamma peqataassaaq.
