Danmarkimi kalaallinik arnanik atortittartoqarpoq

Kalaallit arnat Danmarkimi najugallit unnuiffissaqarniarlutik atoqateqartarneri ajornartorsiutaanera annertuisiartormat Inuuniarnermikkut Ajornartorsiutillit Siunnersuisooqatigiiffiata misissuiffigalugu ingerlatileruttorpaa. Politikkerinit ajornartorsiut eqqumaffigineqarnerulernissaa misissuinermi siunertarineqarpoq.

Allattoq Ane-Marie Petersen

decembarip 03-at 2015 11:37

Siniffissaqarniarluni atoqateqartarneq periarfissatut kingullertut toqqarneqartartoq, Helene Forsberg Inuuniarnermikkut Ajornartorsiutillit Siunnersuisooqatigiiffianni politikkikkut oqaaseqartartup oqaatigaa.

- Arnat oqaloqatiginikuusama ilaasa unnuiffisaaqarniassagamik atoqateqartariaqarsimallutik oqaluttuaraat. Angerlarfissaqannginnerup ajornartoornerulluunniit nalaani taamaasiortariaqarsimanerarput, Helene Forsberg KNR-imut taama oqarpoq.

Aamma atuaruk Kalaallit atortittartut Danmarkimi takussaapput

Siunnersuisooqatigiiffik inuuniarnermikkut ajornartorsiutillit pillugit inuiaqatigiinnut oqaaseqartartuupput, paasissutissiisarlutik ilisimatitsisarlutillu.

Politikkerinit inuiaqatigiinnilu oqallinnermi inuuniarnermikkut ajornartorsiutillit nipaasa tusarneqartarnissaat taakkua siunertaralugu.

Kalaallit arnatai ajornartorsiorlutik saaffiginnittartut amerliartormata taakkua atugaat misissiuiffigissallugit siunnersuisooqatigiit aalajangiussimavaat.

- Ukiut arlallit qaangiuttut saaffiginnittartut amerlatsingaatsiarsimapput. Taamaalillutalu una ajornartorsiut annertusoq paasivarput.

Aningaasanik akilertinneq ajorput

Kalaallit akilertillutik atoqateqartartut danskit arnartaannut naleqqiullugit allaanerussuteqarput.

- Kalaallit arnartai arnanut akilertillutik atoqateqartartunut allanut naleqqiullugit allarluinnaapput. Taakkumi aningaasanik akilertinneq ajorput. Unnuiffissaqarnissaq imaluunniit imerniartarfimmut akiligassat angummut akilertittarpaat. Arnat allat akilertillutik atoqateqartartut aningaasannanniutigisarmassuk.

Unnuiffissarsiortartut pingasunik peqquteqakkajuttarput.

- Uku pineqartut angerlarsimaffeqanngitsuupput, atornerluisuullutik imaluunniit aappaminnik persuttarneqartartut. Tassa taakkua uagut ikiorniagassagut, Inuuniarnermikkut Ajornartorsiuteqartut Siunnersuisooqatigiiffiani politikkikkut oqaaseqartartoq, Helene Forsberg oqarpoq.

Kalaallit arnat pillugit misissuinerup inerneri aappaagu februaarimi saqqummissasut siunertarineqartoq taassuma aamma oqaatigaa.