Kalaallit atortittartut Danmarkimi takussaapput

Kalaallit arnat inuuniarnikkut ajornartorsiortut atoqatigiinnikkut aningaasanik allatulluunniit nalilinnik akilersillutik ikiaroornartunik sakkortuunik atuilersimasut, inuuniarnikkut ajornartorsiortut ornittagaanni Naapiffimmi Københavnimiittumi ningiu Susanne Meyer oqarpoq.

- Ukiup affaata kingulliup ingerlanerani malugaarput ikiaroornartut kokain aamma heroin kalaallit ilaasa atugarilersimagaat. Taamaattoqarnera assut ajuusaarnarpoq, tassami atuisuusut pissutsimikkut sakkortusaartunngortarput. Naliginnaasumik kalaallit pissutsimikkut eqqisisimasutut ilisimaneqaraluarput. Ikiaroornartut tamakku akisoorujussuupput pinngitsuuisinnaajunnaartitsisarlutillu.

- Pinngitsuuisinnaajunnaarsimagaanni akissaqartinnagulu, taava periarfissat tassaalertarput tillinniarneq, ikiaroornartunik tuniniaaneq, arnartaasalu ilaatigut atoqatigiinnikkut aningaasanik, allatulluunniit akilersinnermikkut ikiaroornartoq akissaqartinniartarpaat, Susanne Meyer oqarpoq.

Naapiffimmi sulisut ilaatigut inunnik isumaginninnermut siunnersortit marluusut aammalu inunnik isumagittoq ataaseq atornerluisut akornanni pissutsit atuuttut nutaat qaangerniarlugit assigiinngitsunik suliniuteqarput.

- Inunnik pineqartunik taakkunannga sullissisuusugut paasititsiniaanikkut ajornartorsiummullu eqqummaariffiginninnikkut qaangiiniarneq sulissutigaarput, Susanne Meyer oqarpoq.