Nalunaarusiaq: Sukumiisumik ikiorsiineq kalaallit ikiortariallit oqinnerusumik inuuneqalernerannut ilapittuutaavoq
Danmarkimi kommunini sulisut kalaallinut ikiortarialinnut piffissaalatsigatik ikiuussinnaasarnerat sunniuteqarluarpoq.
Danmarkip inuunermi atukkanik ilisimatusarfianeersup misissueqqissaarisarfianeersullu, tassa Det Nationale Forsknings- og Analysecenter for Velfærdimeersup (VIVE) nalunaarusiartaavani tamanna erserpoq.
Danmarkimi kalaallinut qaammatini qulingiluani sukumiisumik ikiorsiineq qanoq kinguneqarsimanersoq, ilisimatusartuunerup Lars Benjaminsenip misissorpaa.
Danmarkimi kalaallini sukumiisumik ikiorserneqartuni 117-usuni 72-t sukumiisumik ikiorserneqarnertik inaarpaat.
- Sullitamik pisariaqartitai aallaavigalugit qaammatini qulingiluani piffissaalatsiffiunngitsumik eqaatsumillu sukumiisumik ikiorsiisussamik kommunimit ikorfartorteqartitaanerat ikiorseeriaaseq nutaajuvoq, Lars Benjaminsen oqarpoq.
Ikorfartorneqariaannaasarsimasut
Sukumiisumik ikiorserneqartut Aarhusip, Vejlep Odensellu kommuniini najugaqarput, taakkulu assersuutigalugu inissaaleqinermik, atornerluinermik peqqinnissarfimmillu sullinneqannginnermik ajornartorsiuteqarsimapput, aningaasaqarnikkut ikiorneqarnissamik pisariaqartitsisimapput qitornatilluunniit pillugit kommunip ilaqutariinnut immikkoortortaqarfianit nakkutigineqarsimapput.
Taakkunannga affaasa missaat kommunimit ikortartortimik sapaatit akunneranut ikinnerpaamik ataasiarlutik ataatsimeeqateqartarsimapput, pingasuugaangatalu ataaseq sapaatit akunneranut marloriarlutik pingasoriarlutilluunniit ataatsimeeqateqartarsimapput. Kommunit taaneqareersut kalaallinut danskisoorpiarsinnaanngitsunut ikiuussinnaasunik ikorfartorteqartitsisimapput.
2017-imi decembari 2020-milu decembarip akornanni qaammatini qulingiluani sukumiisumik ikiorsiisoqarpoq.
Periuseq taanna Critical Time Interventionimik, CTI-mik, ateqartoq USA-meersuuvoq.
Innuttaasup assersuutigalugu nunatsinniit Danmarkimut nuunnermini atugarliortup Danmarkimi isumaginninnermi oqartussanit sutigut tamatigut ikiorserneqarnissaa, siunnersorneqarnissaa ikorfartorneqarnissaalu periutsimi tassani siunertaavoq.
Danmarkimi kalaallini sukumiisumik ikiorserneqartuni 117-usuni 72-t sukumiisumik ikiorserneqarnertik qaammatinik qulingialunik sivisussusilik inaarpaat.
Angutit arnallu kalaallit 18-it 50+-illu akornannik ukiuliupput. Taakkunannga ilaat Damarkimi sivitsumik ilaalu ukiunit qulinit ikinnerunngitsuni najugaqarput.
Taakkunannga ilarpaalui sukumiisumik ikiorserneqarnerminni, Kalaallit Illuutaannit kajumissutsimik ikiuuttutut sulisumik ikorfartorteqarput.
Tusarfik: Nalunaarusiaq "Overgangs- og peerstøtte til udsatte grønlændere i Danmark", Vive
Tassa imaappoq, kalaallit ikiortariallit ajornartorsiutiminnik eqqartueqatigisinnaasaminnik atassuteqarfigisaqariaannaasarsimapput.
Misissuineq pillugu nalunaarusiami ilaatigut ima allaqqavoq: "Sukumiisumik ikiorserneqartut ilarpaalui siornatigut taama ikiorneqaratillu ikorfartorneqarsimanngisaannarsimanerarput."
AAMMA ATUARUK 28 millionit koruunit Danmarkimi kalaallinut ikiortarialinnut ikiorsiissutaassasut
Taakkulu tamarmik sukumiisumik ikiorserneqarnerminni peqqinnerulertutut misigisimapput, taakkunanngalu ilaat Danmarkimi sivikitsumik ukiorpassuarniluunniit najugaqarsimapput. Kalaallillu ilinniartut sulisinnaanngorsartut siornatigut 18 procentiusut sukumiisumik ikiorsiisalernermiit qaammatit qulingiluat kingorna 52 procentinngorput.
- Ilarpassui sukumiisumik ikiorserneqarnerminni oqinnerusumik inuuneqalerlutillu nammineq peqqinnerusorilersoripput. Ilarpaalui initaarnissamik ikiorneqarput, taamaammat ilarpaaluisa sukumiisumik ikiorserneqarnertik iluaqutigilluarpaat, Lars Benjaminsen oqarpoq.
Iliuusaannaagallartoq
Suliniut danskit naalagaaffiata immikkut tapiiffigaa, tapiissutaalu suliniutaannaagallartunut killilimmik piffissalikkami atugassaallutik.
Sukumiisumillu ikiorsiineq Danmarkimi kalaallit ilarpaaluinut iluaqutaagaluaqisoq, taakku sukumiinerusumik ikiorserneqartariaqartunik ilaqarput.
- Ilaasa pisariaqartitatik aallaavigalugit sivisuumik ikiorserneqarluarnissamik pisariaqartitsisut eqqaamasariaqarpoq, Lars Bejaminsen oqarpoq.
AAMMA ATUARUK Martha Abelsen: Innersuussutit isornartorsiornerat kukkuluttorneruvoq
Danmarkimilu kommunit allat paasisat kingulliit ilikkagaqarfigisinnaagaat, taanna isumaqarpoq.
- Inunnik isumaginninnermi iliuusaasimasut ilaat taama sukumiitiginatillu eqaatsiginngillat. Danmarkimili kalaallit immikkut illuinnartumik sukumiisumillu ikiorserneqarnertik iluaqutigilluarsinnaagaat oqinnerusumillu inuuneqalissutigisinnaagaat, suliniummi uani paasisani erserpoq.