Randi Zeeb Sigurdsen timersullammattut toqqagaavoq
Timersornermi tamaviaarussilluartut nalliuttorsiorpalaartumik isiginnaartullu qiimmassimaarluartut isersimasoralugit kulturip illorsuani Katuami arfininngornermi nalliuttorsiutigineqarput timersullammannik toqqaaneq Maligassiuisut show pimmat.
Timersuumminut pikkorissoq piukkunnaateqaqisorlu Randi Zeeb Sigurdsen timersullammattut toqqarneqarpoq ukioq manna Arctic Winter Gamesimi angusarisaarluni oqaluttuarisaanermut ilanngukkami arlalinnillu ujaminnalluni.
Nunaqarfigisaa Ikerasak timersortarfeqanngilaq. Taamaattoq Randi Zeeb Sigurdsen uissuumminartunik angusarissaartarpoq.
Taamaammat nersornaat tigoriitsiarlu inersuarmi isersimasut saallugit naatsumik oqarpoq:
- Timersortarfimmik.
Tamannalu isersimasut nikuillutik ersaartaappaat.
Timersullammattut innersuunneqartut pingasuupput.
Taamaattumik Randi Zeeb Sigurdsen utaqqeqqaarpoq GIF-mi siulittaasutut tunuaqqammisup toqqarneqartup aqqanik højtalerikkut nalunaaruteqarnissaanut.
- Eqqarsarpunga; uanga?, Randi Zeebi Sigurdsen KNR-mut oqaluttuarpoq.
- Qanoriliussallunga naluleraluarpara pissanganermillu merianngulaaleraluarlunga – ippassarli taamaalerpunga, oqarpoq.
Maanna Randi Zeeb Sigurdsen piareersimavoq timersuummini tamaviaarluni sungiusaqqinnissaminut.
- Suli piumassuseqarnarsivoq assorujuk taamatut nalilerneqarluni timersullammattut, Randi Zeeb Sigurdsen oqarpoq.
Nersornaatit allat
Unnuullu ingerlanerani nersornaatit arlallit tunniunneqarput.
Sungiusaallammattut toqqarneqarput Majaq aamma Arnatsiaq Heilmann Sisimiuni SSP-mi sisoraatinik oqilaniuttarnermi qasujaallutik siuarsaanertik pillugu.
Sisimiormiut aamma allamik nersornaatisipput ataatsimoorfimmi eqeersimaarluartutut Minngortuunnguup atuarfiani 3. b. nersornaatisimmata. Taakku sapaatip akunnerata atuarfiusup ingerlanerani timip aalatinnera pingaartitaraat misilittakkamillu sineriammi atuarfiit avitseqatiginialerlugit.
Kenneth Kleist B-67-meersoq aqutsisuullammattut toqqagaavoq sulilluarnermigut Nunatta avataanni arsaattartut peqatigiiffiisa suleqatineqarnerat aqqutissiuummagu.
GIF, Paarisa aamma Elite Sport Greenland nersornaammik nutaamik pilersitsipput timimik aalatitsinermik suliniuteqarluartunut sammititaasumik. Taanna tassaavoq nersornaat Aalasa, taannalu Aasianni maajimi peqqissuusamut tunniunneqarpoq ukiut tamaasa maajimi Aasianni timimik aalatitsinissaq ataqatigiissarluartarmassuk.
Elite Sport Greenlandip pikkorinnerni takutitsilluartutut nersornaataa sisoraaserluni ooqattaasartartumut Ukaleq Slettemarkimut tunniunneqarpoq, piukkunnaatilinnillu inerisaalluartutut nersornaat B-67-meersunut Lôke Svanemut Kali Mathiassenimullu tunniunneqarpoq.
Nersornaasiineq naggaserlugu assammik arsarnermi arnat VM-mut erinarsuutaat ’Nunarput pillugu’ atorneqarpoq inersuarmi isersimasut erinarsoqataaffigisaannik.
