Randi Vestergaard mittarfiit pillugit ingerlatseqatigiiffissuarnut ataatsimeqateqartoq

Aningaasaqarnermut aatsitassanullu naalakkersuisup, Randi Vestergaard Evaldsenip, ingerlatseqatigiiffissuit kattussimasut MP Pension, Siemens aamma MT Højgaard mittarfittaassat aningaasalersorneqarnissaat pilersaarusiugaanissaallu pillugit ataatsimeeqatigigai, Naalakkersuisut tusagassiuutinut nalunaarutigaat.

Aamma Kalaallit Airports A/S-imit Nextpartnersimiillu sinniisut ataatsimiinnermi peqataapput.

Aamma atuaruk Ingerlatseqatigiiffiit nunani allamiut pingasut mittarfiliornissamut aningaasaleerusuttut

- Ingerlatseqatigiiffissuit kattussimasut suleqatigiinnerminnut tunngavigisartik saqqummiuppaat, aammalu aningaasaliinissamut, suliap pilersaarusiornissaanut, kingornatigullu mittarfimmik/mittarfinnik ingerlatsinissamut siunnersuutiminnut atatillugu ingerlatseqatigiiffiit ataasiakkaat tamarmik sunik tunniussaqarsinnaanerat saqqummiuppaat, tusagassiuutunut nalunaarummi allaqqavoq.

- Suleqatigiinnerat suliniutinut sunik periarfissiissanersoq tusassallugu pissanganarpoq. Mittarfinnik pilersitsinissamut aningaasaliinissamullu siunnersuutaasa saniatigut mittarfiit tallineqanerisa takoraniaqartitsinermut sunniutigisinnaasaat pillugit isumassarsiaat aamma pissanganarput, Randi Vestergaard Evaldsen oqarpoq.

Aamma atuaruk Narsarsuarmi innuttaasut ernumapput

Ingerlatseqatigiiffiit MT Højgaard, Siemens MP pensionilu Ilulissani Nuummilu mittarfiit tallineqarnissaannut aningaasaliinissamut piareersimallutik KNR-imut juunimi oqarput. Qaqortumili mittarfimmut aningaasaliinissaq taamani nalornissutigineqarpoq.

Randi Vestergaard Evaldsenip ingerlatseqatigiiffiillu pingasut ataatsimiinnerat ilisimatitsissutaannaavoq.

- Aningaasaliinermik pilersaarusiornerullu ilusaanik pitsaanerpaanik nassaarniarluni suliassaq Kalaallit Airports A/S-imi inissisimammat. Ingerlatseqatigiiffiup suliassaa tassaavoq Ilulissani, Nuummi Qaqortumilu mittarfiliornerit pillugit Naalakkersuisunut innersuussissummik saqqummiussaqarnissaq, tusagassiuutinut nalunaarummi allaqqavoq.

Aamma atuaruk Immanuelsen: Qaqortumi mittarfiliortoqassaaq

Aamma atuaruk Mittarfinnik talliliinissaq qanilliallattoq

Aamma atuaruk Randi mittarfiliortiternissamut aaqqiissutissamik pitsaasumik ujarlertoq