Politikki

Immanuelsen: Qaqortumi mittarfiliortoqassaaq

Qaqortumi mittarfiliortoqassasoq Siumup Inatsisartuni ilaasortaatitaanni siulittaasup, Jens Immanuelsenip erseqqissarpaa, naak Kalaallit Airportsimi siulittaasup, Leo Larsenip, imminut akilersinnaanngitsumik mittarfiliortoqarnissaanik Namminersorlutik Oqartussanut siunnersuinissani takorloorsinnaannginnerareeraluaraa.

Allattoq Bibi Nathansen, Thomas Munk Veirum

aggustip 09-at 2016 13:18

- Taamaattumik Siumumiit nalornisiginagu nalunaarutigisinnaavarput mittarfinnik Ilulissani, Nuummi Qaqortumilu talliliinissaq sanaartornissarlu immikkoortoq 2 attaveqaatini suliassat ingerlanissaanut pilersaarut naapertorlugu naammassineqassammata, Siumup Inatsisartuni gruppia sinnerlugu, Jens Immanuelsen tusagassiuutinut nalunaaruteqarluni allappoq.

Aamma atuaruk Mittarfinnik talliliinissaq qanilliallattoq

Kalaallit Airportsimi siulittaasunngorlaap, Leo Larsen, KNR-imut AG-mullu Nuummi Ilulissanilu mittarfiit tallilerneqarnissaannut Qaqortumilu mittarfiliiortoqarnissaanut aningaasaqarnermut tekinikkikkullu tunngasut apeqqutaasut oqaatigereeraalu Jens Immanuelsen taama nalunaaruteqarpoq.

- Mittarfik imminut akilersinnaananilu illersorsinnaanngippat, taava takorloorsinnaanngilara siulersuisuusugut arlaannaataluunniit Namminersorlutik Oqartussanut mittarfiliornissaq siunnersuutigissagaat, Leo Larsen KNR-imut juulip qaammataani oqarpoq.

Aamma atuaruk Randi mittarfiliortiternissamut aaqqiissutissamik pitsaasumik ujarlertoq

Tamannalu Jens Immanuelsenip qisuariarfigaa, mittarfeqarneq pillugu Inatsisartunit decemberip qaammataani akuerineqartut innersuussutigalugu.

Pilersaarutip imminut akilersinnaassusiaqa apeqqutaatinnagu Qaqortumi mittarfiliortoqarnissaa aalajangiunneqarsimanersoq Radioaviisimit Attaveqaqatigiinnermut Naalakkersuisumit Knud Kristiansenimut akissutissarsoraluarparput iluatsinnaguli.

Kalaallit Airportsip pilersinneqarnissaa tikillugu, decembarip qaammataani 2015-imi Inatsisartuni aalajangerneqartoq, paasinninnertik naapertorlugu sulillutik, tassalu Qaqortumi 1500 meterisut takitigisumik mittarfiliortoqassasoq, Attaveqaqatigiinnermut Naalakkersuisoqarfimmi attaveqaqatigiinnermut immikkoortortami pisortaq, Andreas Østbirk KNR-imut oqarpoq.

Aamma atuaruk Mittarfilioqatigiittussanut aningaasaliissutissat akuersissutigineqarput