Randi mittarfiliortiternissamut aaqqiissutissamik pitsaasumik ujarlertoq
Aningaasaqarnermut naalakkersuisoq Randi Vestergaard Evaldsen KNR-imut taama ilisimatitsivoq.
Ilulissani, Nuummi Qaqortumilu mittarfinnik sanaartortussamik ingerlatsivimmik pilersitsisoqassaaq.
Mittarfinnut aningaasaliisussarsiorneq ingerlatsiviup isumagissavaa, mittarfiilli ataatsimut aningaasaliiffigineqassanersut suli aalajangerneqanngilaq.
- Pingaaruteqarluinnarami paasissutissanik toqqammaveqarluta aalajangiinissarput. Naalakkersuisuninngaanniit pingaartilluinnarparput pingaarutilinnik tunngaveqarluta aalajangiinissaq, taamaammat ingerlatseqatigiiffiup aningaasaliinermut tunngasut periarfissat assigiinngitsut ujartussavai, aningaasaqarnermut naalakkersuisoq Randi Vestergaard Evaldsen taama oqarpoq.
Aamma atuaruk Ingerlatseqatigiiffiit nunani allamiut pingasut mittarfiliornissamut aningaasaleerusuttut
Aamma atuaruk Mittarfilioqatigiittussanut aningaasaliissutissat akuersissutigineqarput
Nuummi Ilulissanilu mittarfiliornissamut danskit ingerlatseqatigiiffii aningaasaleerusullutik KNR-imut ullumi oqarput. Qaqortumili mittarfissamut aningaasaliissaalerlutik suli nalornissutigaat.
Ingerlatsivillu pilersinniarlugu aningaasat Nukissiorfimmut taarsigassarsiatut immikkoortitat atorneqarnissaat, Inuit Ataqatigiit siulittaasuata ilaatigut aamma apeqquserpaa.
- Piumasaqaateqarsimagaluarpugut qulaajaaqqaartoqassasoq, qanorpiaq kinguneqassanersoq aningaasat taakkua tassanngaanniit nuunneqarunik,
IA-mi siulittaasoq Sara Olsvig ullumi taama oqarpoq.
Aamma atuaruk IA: Qulaajaasoqaqqaarli
200 millionit koruunilli ingerlatsivimmut nuunneqarpata Nukissiorfinnut kinguneqarnavianngitsoq, Evaldsen oqarpoq.
Tassami Nukissiorfimmiit nalunaarsimapput, 200 millionit koruunit uninngaannarmata atorfissaqartinngikkitik, aningaasallu maanna sanaartornermut iluarsaassinermullu aningaasaateqarfimmi uninngasut.
- Aningaasat tiguneqartut sanaartornermut iluarsaassinermullu aningaasaateqarfimmi uninngaannartuupput, taamaammat sunniuteqarnavianngillat inuiaqatitsinnut, Randi Vestergaard Evaldsen taama oqarpoq.