IA: Qulaajaasoqaqqaarli
Ingerlatsiviup, mittarfinnik sanaartortussap, pilersinneqarnissaanut 200 millionit koruunit ilaatigut aningaasaliissutigineqassapput, taakkulu Nukissiorfimmut taarsigassarsiassatut immikkoortitanit aaneqarlutik. Tamatumalu kingunissaa qulaajarneqaqqaartariaqartoq, IA-mi isumaqarput.
- Piumasaqaateqarsimagaluarpugut qulaajaaqqaartoqassasoq, aningaasat taakkua qanorpiaq kinguneqassanersoq tassanngaanniit nuunneqarunik, Inuit Ataqatigiit siulittaasuat Sara Olsvig oqarpoq.
Aamma atuaruk Ingerlatseqatigiiffiit nunani allamiut pingasut mittarfiliornissamut aningaasaleerusuttut
Aningaasalli Nukissiorfimmut immikkoortitat siornaalli uninngammata ingerlatsiviliornermut atorneqassasut Aningaasaqarnermut Akileraartarnermullu Ataatsimiititaliami siulittaasoq oqarpoq.
- Naalakkersuisut qinnuteqaataanni erseqqissumik allaqqavoq 2014-imi 2015-imilu atunngitsuukkat taakku piginneqatigiiffiliornermi aningaasaliissutissatut qinnutigineqartut, Ataatsimiititaliami siulittaasoq, Siumumeersoq Jens Immanuelsen, oqarpoq.
Aamma atuaruk Mittarfilioqatigiittussanut aningaasaliissutissat akuersissutigineqarput
Naalakkersuisut ingerlatsivimmik mittarfiliortitsisussamik pilersitsinissamut 200 millionit koruuninik aningaasaliinissamut innersuussutaat Aningaasaqarnermut Akileraartarnermullu Ataatsimiititaliamit akuerineqarmat, illuatungiliuttut Inuit Ataqatigiit tamanna arlalitsigut apeqquserpaat.
Mittarfiit pingasut ataatsimut aningaasaliiffigineqassanersut erseqqissumik akineqanngitsoq, Sara Olsvig isumaqarpoq. Qaqortup pilersaarummut ilanngunneqarneranut tamanna imminut akilersinnaanersoq qulaajarneqarsimanngimmat Inuit Ataqatigiinniit apeqquserneqarpoq.
Aamma atuaruk Mittarfiit pillugit pilersaarut akuersissutigineqarpoq
- Ilisimasat suli annikipput, taamaammat A/S-iliornermi, nunattalu karsianut amigartooruteqannginnissamik qulaajaanissaq piumasarisimagaluarparput. Imminut akilersinnaanerusut siulliullugit aammalu sanaartornermut ataatsimiititaliap tulleriiaarinissamut aalajangiussimasaa malinneqarnissaanut piumasaqarsimalluta.
Aamma atuaruk Ilulissani mittarfiup tallinissaa pisariaqartinneqarpoq
Aningaasaliisussalli mittarfiit ataatsimut immikkulluunniit aningaasaliiffigissaneraat, ingerlatsiviup nutaap nammineq qulaajaaffigissagaa Jens Immanuelsen oqarpoq.
- Maanna aktieselskabimik pilersitsinermik suliassat aallartipput. Tamakku qulaajaaffigalugit aallartinneqarsinnaalerput, Jens Immanuelsen oqarpoq.
